Фудбалерите на лондонски Челзи се првите финалисти на Светското клупско првенство, откако го победија бразилскиот тим Флуминензе со 2:0 во првото полуфинале на натпреварувањето.

Натпреварот се одигра на стадионот „МетЛајф“ во Њу Џерси, а двата гола за Челзи ги постигна новодојдениот Жоао Педро, поранешен играч на Флуминензе.

Бразилецот во 18. минута со прецизен удар од врвот на шеснаесетникот го погоди спротивниот агол од противничкиот гол за водство на Англичаните. Во 56. минута Педро ѝ избега на противничката одбрана, влета во шеснаесетникот, а потоа со силен удар од околу 10 метри погоди прецизно под пречката.

Челзи ќе игра против подобриот во натпреварот меѓу двата последни европски шампиони, Реал Мадрид - ПСЖ, кој се игра во недела, а финалето е закажано за среда 16 јули.