Масовниот убиец Крешимир Пахоки (52) денес беше осуден во Окружниот суд во Бјеловар на 50 години затвор за убиството на шест лица, лани во Домот за стари лица во Дарувар.

Казната е изречена врз основа на обвинението со кое Пахокија се товари за 13 кривични дела, вклучувајќи пет тешки убиства, едно убиство и обид за убиство.

Времето поминато во затвор од неговото апсење е вклучено во неговата казна, а неговиот притвор е продолжен до правосилност на пресудата, објавија хрватските медиуми.

Злосторството се случило на 22 јули минатата година кога Пахоки, кој е пензиониран воен полицаец, дошол во домот за стари лица за да го плати долгот за домување на неговата мајка. Откако разговарал со сопственикот, извадил пиштол и почнал да пука кон присутните.

Пахоки ја убил својата мајка, негувателката и четворица жители на домот, а ранил уште шест други.

Испукал најмалку 14 куршуми, двапати го наполнил револверот и по злосторството отишол во блиското кафуле каде што полицијата го уапсила.

На судењето се изјаснил за невин. „Бранев кога беше потребно, ги поздравувам сите хрватски бранители“, рече Пахоки, за кого при психијатриски преглед било утврдено дека е целосно присебен, но дека има знаци на нарцисоидно однесување и антисоцијално растројство на личноста.