Денеска во ексклузивна населба во градот Бургас во југоисточна Бугарија избувна пожар, при што изгореа најмалку 25 куќи, а беше наредена масовна евакуација.

Пожарот избувнал околу 11:30 часот по локално време во зоната „Остриците 2“ на копно со сува вегетација и брзо се проширил, објавува порталот „Новините“, додавајќи дека системот за предупредување не бил активиран, и покрај сериозноста на ситуацијата.

Во гаснењето, покрај противпожарните екипи, учествувале и волонтери, а градоначалникот Димитар Николов дошол на местото на настанот и рекол дека пожарникарите работат на сечење на пристапните патишта со цел да се спречи ширењето на пожарот кон источниот дел од станбената зона.

„За жал, околу 25 куќи веќе се уништени, од кои шест или седум беа целосно населени. Полицијата активно ги евакуира луѓето од нивните имоти. Фала му на Бога, нема жртви“, рече Николов.

Според него, периметарот на пожарот постојано се движи поради силните ветрови, што ја прави ситуацијата покомплицирана за службите за итни случаи.

Во исто време, тој апелираше до сите жители да се држат подалеку од областа до понатамошно известување.

Според порталот, евакуацијата на жителите од таа населба сè уште е во тек.