Капитенот на хрватската репрезентација Лука Модриќ потпиша едногодишен договор со Милан до летото 2026 година, со можност за продолжување за уште една сезона.

Финансиски детали од дроговорот не се познати.

Модриќ ќе го носи дресот со број 14 во Милан, а последен пат го носеше тој број во Тотенхем, за кого играше до летото 2012 година. За тимот од Лондон одигра 159 натпревари и постигна 17 голови.

Големиот трансфер во Реал Мадрид се случи во 2012 година.

Во текот на 13 сезони во дресот на Кралскиот клуб, Модриќ одигра 597 натпревари и постигна 43 голови, станувајќи најодликуваниот играч во историјата на Реал: шест титули во Лигата на шампионите, пет Светски првенства за клубови, еден Интерконтинентален куп, пет Европски Суперкупа, четири титули во шпанското првенство, два Купа на кралеви и пет Шпански Суперкупа.

Лука учествуваше како капитен на Реал Мадрид на Светското клупско првенство во САД минатата недела, каде што неговиот тим беше елиминиран во полуфиналето со резултат 0-4 од францускиот ПСЖ. Тој доаѓа во Милан како слободен агент откако не успеа да се договори за продолжување на договорот со Реал Мадрид.

Претставувајќи ја Хрватска во 2018 година, освои сребро на Светското првенство во Русија, а четири години подоцна, бронза на Светското првенство во Катар. Модриќ ја освои и „Златната топка“ во 2018 година.

По потпишувањето на договорот, тој ќе замине на одмор, а на 4 август ќе се приклучи на новиот тим под водство на тренерот Масимилијано Алегри на подготовки.