Унгарскиот премиер Виктор Орбан во четврток изрази силно противење на потенцијалното пристапување на Украина во Европската унија, предупредувајќи дека интеграцијата на земја во војна би претставувала сериозна закана за стабилноста на блокот.

Зборувајќи во пресрет на самитот на Европскиот совет во Брисел, Орбан рече дека 95 проценти од Унгарците гласале против пристапувањето на Украина во Европската унија.

„Проблемот е војната. Ако ја интегрираме Украина во Европската унија, би интегрирале војна“, рече Орбан.

Тој нагласи дека Унгарија не сака да дели политичка и економска заедница со земја која моментално е во конфликт.

„Не би сакале да бидеме заедно во една заедница со земја која е во војна и претставува непосредна опасност за нас. Ако членка на Европската Унија е во војна, тоа значи дека и Европската Унија е во војна, а тоа не ни се допаѓа“, додаде тој.

Коментарите на Орбан ги нагласуваат длабоките поделби во ЕУ околу кандидатурата на Украина за членство, бидејќи неколку земји-членки инсистираат на побрза интеграција во услови на тековната војна со Русија.

Унгарија, сепак, продолжува со ветото, наведувајќи безбедносни и геополитички проблеми.

Орбан повторно зазеде силен став против миграциската политика на ЕУ, повикувајќи ги земјите-членки да се побунат против она што тој го опиша како неефикасни и премногу благи прописи.

„Разговаравме 100 пати за тоа како да се промени и направи регулативата за миграција поефикасна и ништо не се случи“, рече тој.

Унгарскиот лидер ја бранеше строгата гранична политика на неговата земја, која спречува влез без претходно одобрение од унгарските власти.

„Ако не го сторите тоа, тоа никогаш нема да престане“, предупреди тој.

Орбан ги повика другите земји од ЕУ да го следат примерот на Унгарија и да се спротивстават на заедничката миграциска политика на блокот.

„Она што им го предлагам на сите мои колеги е бунт, бунт, бунт“, заклучи тој.