Миграцијата во Европската Унија доведе до тоа нејзиното население да достигне рекордни 450,4 милиони луѓе минатата година, компензирајќи го природниот пад на бројот на жители четврта година по ред, покажаа податоците на ЕУ објавени денес.

Од 2012 година, во ЕУ има повеќе смртни случаи отколку раѓања годишно, па затоа миграцијата е единствениот двигател на растот на населението, објавува Ројтерс.

Овој тренд го истакнува демографскиот предизвик на Европа, бидејќи стареењето на населението и ниските стапки на фертилитет ги оптоваруваат системите за социјална заштита и создаваат недостиг на работна сила.

Европскиот блок доби 1,07 милиони жители во 2024 година, со позитивен нето миграциски биланс од 2,3 милиони луѓе што компензира за природен пад на населението од 1,3 милиони, бидејќи бројот на смртни случаи (4,82 милиони) сè уште беше поголем од бројот на раѓања (3,56 милиони).

Германија, Франција и Италија сѐ уште се земјите со најголем број жители во европскиот блок и сочинуваат речиси половина од вкупното население на ЕУ, или 47 проценти.

Додека 19 земји од ЕУ забележаа зголемување на населението во 2024 година, осум земји имаа намалување.

Малта забележа највисока стапка на раст од 19 на 1.000 жители, по што следуваат Ирска (16,3) и Луксембург (14,7).

Меѓу земјите со пад на населението, најизразен беше во Латвија (-9,9), по што следуваат Унгарија (-4,7), Полска и Естонија (-3,4 секоја).