Шпанскиот надзорен орган за конкуренција и енергeтика денес објави дека ги ажурирал правилата што ги одредуваат обврските за контрола на напонот во електричната мрежа за електраните, со цел да се прошири улогата што ја играат електраните на обновливи извори на енергија, објавува Ројтерс.

Усвојувањето на ажурирани правила е една од мерките што ги препорача шпанската влада во својот извештај за причините за масовниот прекин на струја низ Шпанија и Португалија, што се случи на 28 април.

По истрагата на владата, тогаш беше објавено дека ненадејното зголемување на напонот е „непосредна причина за масовниот прекин на струјата“.

Ажурираните правила, од кои повеќето се стари 25 години, воведуваат нови барања за електраните за обновлива енергија, како што се сончевата и ветерната енергија, кога станува збор за механизмите за контрола на напонот.

Ова значи дека овие електрани ќе можат да нудат услуги за контрола на напонот, што досега можеа да ги понудат само конвенционалните електрани - термоцентрали што користат јаглен, гас и нуклеарна енергија - и хидраулично производство.

Досега, кога операторот на мрежата Ред Електрика (РEE) го пресметуваше енергетскиот микс за следниот ден, можеше да ги повика само конвенционалните електрани да понудат поголем дел од можностите за контрола на напонот.

Новата рамка дава „хомоген третман на услугата што ја обезбедуваат електраните за обновливи извори на енергија и други производствени постројки“, според соопштението за печатот на шпанските власти.