Италијанскиот министер за надворешни работи, Антонио Тајани, најави листа на царини од ЕУ во вредност од 21 милијарда евра како одговор на неодамна објавените царини од САД, доколку не се постигне договор.

„Првиот список на европски царини во вредност од 21 милијарда евра е подготвен, а би можел да се додаде и втор. Уверен сум дека ќе има напредок. Царините им штетат на сите, почнувајќи од САД“, изјави Тајани за дневниот весник „Ил Месаџеро“.

Тој истакна дека падот на берзата би ги довел во опасност пензиите и заштедите на Американците и повтори дека нивната долгорочна цел е нулти царини, овозможувајќи отворен пазар меѓу САД, ЕУ, Канада и Мексико.

„Мојата мантра е да постигнеме двојна нула: без царини меѓу Европа и САД. Сфаќам дека не е лесно, но тоа е единствениот начин заедно да ги развиваме нашите економии“, рече Тајани.

Тој, исто така, ја повика Европа да преговара на смирен и прибран начин „со крената глава“, нагласувајќи дека е „во интерес на сите“ да се избегне трговска војна, бидејќи „на Европа ѝ е потребна Америка и обратно“.

Во саботата, Трамп објави дека САД ќе воведат царини од 30% за ЕУ и Мексико почнувајќи од 1 август, ставајќи ги во опасност трговските разговори меѓу САД и ЕУ, бидејќи блокот имаше за цел да финализира сеопфатен трговски договор овој месец.

Во објава на Truth Social, Трамп сподели одделни писма упатени до претседателката на Европската комисија, Урсула фон дер Лајен, и до мексиканската претседателка, Клаудија Шајнбаум, во кои најавува царина од 30% за стоки од Европа и Мексико наменети за САД.

Потоа Урсула фон дер Лајен изрази подготвеност да работи на постигнување договор со САД до 1 август и вети дека ќе преземе сите потребни чекори за заштита на интересите на ЕУ, вклучително и усвојување на пропорционални контрамерки.