Комитетот на Европскиот парламент за сообраќај и транспорт денес ја поддржа измената на законот за правата на патниците во воздушниот сообраќај, со која би се овозможило бесплатно носење рачен багаж до седум килограми, без дополнителни трошоци.
Ако се потврди во понатамошните преговори со земјите-членки на ЕУ, на патниците ќе им биде дозволено да понесат торба со тежина до седум килограми, заедно со уште еден помал личен предмет што може да се смести под седиштето, пишува Политико.
На оваа промена силно се спротивставуваат лоби групите на авиокомпаниите, кои предупредуваат дека регулативата може да изврши притисок врз превозниците да ги зголемат цените на билетите, дури и за патниците со минимален багаж.
„Европскиот парламент треба да им дозволи на патниците сами да одлучат какви услуги сакаат, за што се подготвени да платат, но и што не сакаат“, изјави Уранија Јоргуцака, генерален директор на лобито „Авиокомпанија за Европа“ (A4E), во изјава пред гласањето.
Пратениците потсетуваат дека новото право се базира на пресудата на Судот на правдата на Европската Унија од 2014 година, во која е утврдено дека рачниот багаж е „неопходен аспект“ на превозот на патници, под услов да ги исполнува „разумните барања“ во однос на тежината и димензиите.
Покрај ограничувањето од седум килограми, новата норма предвидува дека димензиите на рачниот багаж не смеат да го надминат збирот од должина, ширина и висина од 100 сантиметри.
Се предвидува дека тоа ќе има најголемо влијание врз нискобуџетните авиокомпании, кои во моментов наплаќаат само за носење поголема торба, додека помала може да се внесе бесплатно.
Покрај финансиските загуби, авиокомпаниите се загрижени дека дозволувањето на сите патници да носат рачен багаж до седум килограми може да предизвика проблеми со качувањето во авионот и дополнителни доцнења ако багажот не се вклопува во шкафчињата во кабината.
Стивен Бергер, виш правен советник на Европската организација за заштита на потрошувачите, го поздрави „недвосмислениот став за рачниот багаж“, оценувајќи дека тој го задоволува „фундаменталното барање на потрошувачите“ да можат бесплатно да земат личен предмет и рачен багаж.
