Американскиот претседател Доналд Трамп во понеделник се закани дека ќе воведе 100 проценти секундарни царини за Русија ако не се постигне договор за прекин на војната во Украина во следните 50 дена.

Зборувајќи за време на средбата со генералниот секретар на НАТО, Марк Руте, во Овалната соба, Трамп рече дека е „многу незадоволен“ од Русија и разочаран од претседателот Владимир Путин.

„Ќе воведеме многу строги тарифи ако не постигнеме договор во рок од 50 дена. Тарифите од околу 100 проценти би се нарекле секундарни тарифи“, рече Трамп, наведувајќи дека тарифите ќе бидат воведени без согласност на Претставничкиот дом или Сенатот.

Секундарните тарифи подразбираат дека санкциите би важеле и за други земји, односно за земји што купуваат руска нафта.

Кога беше прашан дали ќе бидат воведени тарифи од 500 проценти за Русија, тој рече дека бројот не е важен по одредена точка и дека тарифите од 100 проценти „ќе ја исполнат целта“.

Трамп рече дека Москва мора да ја врати руската економија на вистинскиот пат, како и дека Русија има „огромен потенцијал“ и дека треба да ги користи своите ресурси за трговија, а не за војна.

Зборувајќи за Путин, Трамп рече дека „многу разговара со него“ и дека овие разговори се многу пријатни, но дека разговорот „не значи ништо“ кога ракетите погодуваат градови.

Американскиот претседател рече дека чувствува дека имал договор со Русија за војната во Украина „околу четири пати“.

„Мислев дека требаше долго време за да се постигне договор, но тоа само продолжува и продолжува“, рече Трамп.

Кога беше прашан колку далеку е подготвен да оди како одговор доколку рускиот претседател Владимир Путин ги ескалира нападите, Трамп им рече на новинарите дa не му поставуваат такви прашања“.

Нарекувајќи ја војната во Украина, која трае од февруари 2022 година, „војната на Бајден“, Трамп додаде: „Би сакал да заврши. Тоа не беше моја војна... Се обидувам да ве извлечам од неа. На крајот на краиштата, силна Европа е многу добра работа“.

Тој, исто така, објави дека САД ќе испорачаат оружје вредно милијарди долари на Украина преку НАТО, но дека трошоците ќе ги сносат целосно европските сојузници.

Трамп, на заедничка прес-конференција во Белата куќа со генералниот секретар на НАТО, Марк Руте, потврди договор со членките на НАТО, главно од Европа, за испорака на „врвно“ оружје што ќе ѝ помогне на Украина, вклучувајќи ги и ракетните системи „Патриот“, за кои рече дека ќе бидат испратени во таа земја „во рок од неколку дена“.

Тој појасни дека земјите-членки на ЕУ и НАТО ќе ги испратат своите системи „Патриот“ во Украина, а дека САД ќе испратат замена во тие земји.

„Денес постигнавме договор... Ќе им испратиме оружје кое тие ќе платат. САД не плаќаат ништо. Ние го произведуваме, а тие го финансираат“, рече Трамп.

Руте го потврди договорот: „САД одлучија масовно да ја снабдуваат Украина со сè што ѝ е потребно преку НАТО. Европејците целосно го финансираат“.