Едно од 10 деца во Газа прегледани во клиниките на УНРВА од почетокот на 2024 година е неухрането, соопшти агенцијата во вторник.

„Нашите здравствени тимови потврдуваат дека неухранетоста во Газа е во пораст, особено откако опсадата беше затегната на 2 март, пред повеќе од четири месеци, изјави портпаролката на УНРВА, Жулиет Тума, за новинарите во Женева преку видео врска од Јордан.

УНРВA соопшти дека прегледала повеќе од 240.000 момчиња и девојчиња под петгодишна возраст во своите клиники од јануари 2024 година, додавајќи дека пред војната, акутната неухранетост ретко се гледала во Појасот Газа.

„Медицинскиот техничар со кој разговаравме ни рече дека во минатото видел вакви случаи на неухранетост само во учебници и документарни филмови. Лекови, залихи од храна, хигиенски материјал, гориво, сè брзо исчезнува“, предупреди Тума.

УНИЦЕФ во понеделник објави дека во јуни кај повеќе од 5.800 деца е дијагностицирана неухранетост во Газа, вклучувајќи повеќе од 1.000 деца со тешка, акутна неухранетост.

Тие наведуваат дека овие податоци укажуваат на зголемување на неухранетоста четврти месец по ред.

На 19 мај, Израел ја укина 11-неделната блокада за помош на Газа и дозволи ограничените испораки на ОН да продолжат. Сепак, на УНРВА сè уште ѝ е забрането да внесува помош во енклавата.

Израел и САД ја обвинија палестинската милитантна група Хамас за кражба на залихи од помош од хуманитарни операции предводени од ОН, што Хамас го негира.

Затоа ја основаа Хуманитарната фондација за Газа и користат приватни американски компании за безбедност и логистика за транспорт на помош до дистрибутивните центри, со кои ОН одбива да соработува.

Според Ројтерс, најмалку 875 Палестинци се убиени на пунктовите за помош во последните шест недели.