Кевин Хасет, главниот економски советник на американскиот претседател Доналд Трамп, изјави денеска дека САД „веднаш“ ги продолжуваат трговските преговори со Канада откако таа се согласи да престане да го воведува данокот за дигитални услуги.

Тој рече дека Трамп побарал од Канаѓаните да го повлечат данокот на состанокот на Г7.

„Тоа е нешто што го проучиле; сега се согласиле со тоа и сигурно, тоа значи дека можеме да се вратиме на преговорите“, истакна Хасет.

Доцна вчера, Канада објави дека ќе го повлече својот и ќе ги продолжи преговорите со САД со цел постигнување трговски договор до 21 јули.

„Денешното соопштение ќе поддржи продолжување на преговорите кон временската рамка од 21 јули 2025 година, утврдена на самитот на лидерите на Г7 во Кананаскис овој месец“, изјави канадскиот премиер Марк Карни.

„Во нашите преговори за нов економски и безбедносен однос меѓу Канада и Соединетите Американски Држави, новата влада на Канада секогаш ќе се води од целокупниот придонес на секој можен договор во најдобрите интереси на канадските работници и бизниси“, рече тој.

Овој развој на настаните се случи откако Трамп на 27 јуни објави дека САД ќе ги прекинат трговските преговори со Канада поради данокот.