Израелскиот министер за одбрана Израел Кац денес се закани дека ќе го елиминира врховниот лидер на Иран, ајатолахот Али Хаменеи.

„Таква личност не смее да постои“, рече Кац во изјавата објавена во весникот „Једиот Ахронот“.

Израелскиот министер го нарече Хаменеи „современ Хитлер“.

„Диктатор како Хаменеи, кој го води Иран и го има уништувањето на Израел како своја главна цел, не може да продолжи да постои“, рече тој.

„Спречувањето на неговото постоење е една од целите на операцијата.“

Тој ги упати овие закани неколку часа откако околу 20-30 ирански ракети ги погодија централните градови на Израел, вклучително Тел Авив, Рамат Ган и Холон, како и болницата „Сорока“ во јужниот град Бершеба.

Според израелските власти, во нападот се повредени повеќе од 80 Израелци.

Иранската државна новинска агенција ИРНА тврди дека ракетите биле насочени кон седиштето на израелската армија и разузнавачката служба во близина на болницата „Сорока“ и дека неколку лица биле повредени.

Тензиите ескалираа во петокот кога Израел изврши воздушни напади врз неколку локации низ Иран, вклучително воени и нуклеарни објекти, по што Техеран започна со одмазднички напади.

Израелските власти соопштија дека оттогаш се загинати најмалку 24 лица, а стотици се повредени во иранските ракетни напади.

Во Иран се загинати 639 лица, а повеќе од 1.329 се ранети во израелските напади, според извештаите на иранските медиуми.