Германската влада планира да купи дополнителни 15 борбени авиони Ф-35, зголемувајќи ја планираната флота од авиони произведени во САД.

„Политико“ објави дека одлуката следува по неуспехот на Германија и Франција да ги решат несогласувањата околу европската програма за борбени авиони од следната генерација ФКАС. Според написите, ова го поттикна Берлин да набави дополнителни авиони Ф-35 за да го надмине недостигот во капацитетите.

Портпаролот на германското Министерство за одбрана, Кенет Хармс, не ја потврди информацијата. „Во моментов нема планови во Министерството за одбрана за набавка на дополнителни авиони Ф-35 покрај оние што се веќе договорени“, изјави тој, без да даде дополнителни детали.

Во 2022 година, Германија одлучи да купи 35 авиони Ф-35 за да ги замени своите застарени борбени авиони „Торнадо“, кои се способни да испорачаат нуклеарни бомби и се распоредени како дел од политиката на НАТО за нуклеарно одвраќање.

Набавката ќе чини приближно 10 милијарди евра. Германските воздухопловни сили ќе ги добијат првите Ф-35 во 2026 година, а обуката за пилоти и техничари ќе започне во САД.

Борбените авиони ќе бидат стационирани во воздухопловната база Бухел од 2027 година па натаму и ќе ги заменат застарените авиони Торнадо до 2030 година.