Косовскиот премиер Албин Курти кој во Скопје престојува по повод Самитот на лидерите на Западен Балкан и Европската Унија (ЕУ), посветен на Планот за раст истакна дека за него претставува задоволство да биде во Скопје, потенцирајќи ги заедничките проекти меѓу владите, но и членството во ЕУ и НАТО, како стратешка определба на двете земји.

„За мене е секогаш задоволство да дојдам во Скопје, особено сега кога имаме заеднички контролни точки (гранични премини), на Елез Хан-Блаце и Глобочица–Јажинце. Сите овие се резултат на заедничките договори кои сме ги направиле со Владата предводена од Мицкоски. Секогаш е задоволство да дојдам во Скопје, во главен град на една земја која е членка на НАТО, но и секако и една земја која заедно со сите други земји од Западен Балкан цели кон интеграција во ЕУ“, изјави Курти за новинарите во Скопје.

На самитот, чиј домаќин е македонскиот премиер Христијан Мицкоски, присуствуваат комесарката за проширување на ЕУ, Марта Кос, лидерите од Западен Балкан, министри, високи претставници на ЕУ и регионални и мегународни организации.

Во рамките на самитот се одржуваат два панела. Првиот ќе биде посветен на Планот за раст на Западен Балкан, а вториот панел ќе биде посветен на конкретните механизми и поддршката за спроведување на Планот за раст.

По првиот панел Кос и Мицкоски одржаа заедничка прес-конференција.

Покрај Мицкоски и Кос, на самитот присуствуваат и албанскиот премиер Еди Рама, премиерот на Црна Гора, Милојко Спајиќ, претседавачката со Советот на министри на Босна и Херцеговина, Борјана Кристо, српскиот министер за европски интеграции Немања Старовиќ и вршителот на должноста премиер на Косово, Албин Курти.