Вишото јавно обвинителство во Нови Сад денес објави дека, поради дополнување на истрагата, во моментов не е во можност да ја заврши истражната постапка и да поднесе обвиненија во случајот со падот на натстрешницата на Железничката станица во Нови Сад на 1 ноември минатата година, кога загинаа 16 лица.

„Како дел од дополнителната истрага, обвинителството презеде доказни дејствија, а на 16, 17, 23, 28 и 30 април беа испрашани сите сведоци и оние чие повторно испитување беше наредено од Вишиот суд во Нови Сад, иако овие сведоци веќе беа испрашани и одговараа на истите прашања пред да биде поднесено обвинението, додека на 29 април започна испитувањето на комисијата на вештаци, кое беше прекинато поради процедуралните предлози на одбраната“, објави обвинителството.

Според ВЈО, целиот истражен предмет бил доставен до Вишиот суд во Нови Сад со цел да се одлучи по процедуралните предлози на одбраната: да се извлечат одредени докази од списите на предметот, како и да се преземат одредени доказни дејствија, кои обвинителството претходно ги отфрли, сметајќи ги за излишни.

„Бидејќи Вишиот суд во Нови Сад досега не одлучил по овие предлози, а бидејќи станува збор за предмет за кој постои зголемен јавен интерес, обвинителството испрати барање до Вишиот суд во Нови Сад за да се посочат наведените околности“, се наведува во соопштението.

Поради сето погоре наведено, обвинителството наведува дека во моментов е невозможно да се заврши истрагата и да се поднесе обвинение против лицата одговорни за тој настан.

Обвинителството објави дека ќе преземе сите дејствија во рамките на својата надлежност за да ги повика на одговорност сите одговорни лица согласно законот за уривање на настрешницата на Железничката станица во Нови Сад, кога животот го загубија 16 лица, меѓу кои и четири малолетници, а кога едно лице беше тешко повредено.

Во соопштението, обвинителството наведува дека очекува судот да го врати истражниот предмет во краток временски период, за да може обвинителството да ја заврши истрагата и да поднесе целосен обвинителен акт, кој, како што додаваат, недвосмислено ќе укаже на кривичната одговорност на обвинетите лица.

Обвинението против 13 лица беше поднесено кон крајот на 2024 година, но судот го врати за да се дополни истрагата.

Апелациониот суд во Нови Сад, пак, денеска го укина притворот на петмина осомничени. Судот донел одлука со која делумно ги прифатил жалбите на адвокатите на обвинетите за трагедијата во Нови Сад, која предизвика бран повеќемесечни протести и обвинувања на властите за коруптивни практики и лошо извршување на работите на неодамнешната реконструкција на станицата.

Меѓу првично уапсените, судот веќе го укина притворот на поранешниот министер за градежништво, Горан Весиќ, а со новата пресудата, на петмината обвинети ќе се примени електронски надзор и забрана за напуштање на станот во траење од три месеци, како и забрана за користење телефони, интернет и прием на други лица во станот.