Турскиот претседател Реџеп Таип Ердоган денес рече дека Анкара ги осудува „сите форми на напади“ кои го нарушуваат суверенитетот на Катар, нагласувајќи ја поддршката на Турција за своите „катарски браќа“ во телефонски разговор со емирот Тамим бин Хамад ал-Тани, соопшти Директоратот за комуникации при турското Претседателство.

За време на разговорот, станало збор за билатералните односи, како и за регионалните и глобални прашања.

Ердоган истакна дека за време на самитот на НАТО разговарал со своите колеги за воената ескалација меѓу Иран и Израел.

Турскиот претседател изрази надеж дека страните ќе се придржуваат до фактичкиот прекин на огнот и дека постигнатиот мир ќе биде одржан.