Иранскиот министер за надворешни работи, Абас Аракчи, во телефонски разговор со високата претставничка на ЕУ за надворешна и безбедносна политика, Каја Калас, изјави дека постигнувањето договор со Иран бара избегнување на нереални и нелогични позиции.

Аракчи ја информираше Калас за најновите случувања во врска со индиректните преговори меѓу Иран и Соединетите Американски Држави.

Тој рече дека Техеран е подготвен за разговори со големите европски сили за да ги реши нивните загрижености во врска со можноста Иран да стекне нуклеарно оружје, пренесува Ирна.

Според него, Иран е подготвен да ги продолжи контактите со Велика Британија, Франција и Германија и изрази надеж дека разговорите засновани на конструктивен пристап ќе продолжат.

„Иран избра одговорен пристап следејќи го патот на дипломатијата со цел да ги реши вештачките загрижености во врска со мирнодопската нуклеарна програма“, истакна Аракчи и ја нагласи потребата да се продолжи по овој пат со сериозна решителност и реализам.

„Доколку се тврди дека можноста Иран да стекне нуклеарно оружје е единствената грижа на преговарачките страни, таа загриженост може да се ублажи. Сосема е можно да се постигне договор во овој поглед, но тоа бара избегнување на нереални и ирационални позиции“, заклучи тој.

Високата претставничка на Европската Унија за надворешни работи и безбедносна политика претходно изјави дека во разговорот со Аракчи го повикала Иран да ја прекине воената поддршка за Русија и изразила загриженост за притворените граѓани на ЕУ и човековите права во таа земја.

Таа подвлече дека односите меѓу ЕУ и Иран зависат од напредокот во сите овие области.