Компанијата OпенАИ, позната по развојот на вештачка интелигенција, е во завршна фаза на развој на нов интернет прелистувач базиран на вештачка интелигенција, што би можело да претставува предизвик за доминантниот на пазарот Гугл Хром, изјавија за Ројтерс луѓе запознаени со плановите на компанијата.

Според овие извори, пребарувачот би можел да биде лансиран во наредните недели, а неговата цел е фундаментално да го промени начинот на кој корисниците пребаруваат на интернет со помош на вештачката интелигенција.

Доколку овој производ биде прифатен од 500 милиони активни корисници на ЧетГПТ неделно, ОпенАИ би можел да добие директен увид во вредните податоци за корисниците, што е клучен извор на приход за Гугл, кој ги користи податоците собрани преку Хром за попрецизно рекламирање, објаснува Ројтерс.

Хром во моментов претставува важен столб на деловниот модел на матичната компанија на Гугл, Алфабет, со оглед на тоа што придонесува за генерирање реклами кои носат околу три четвртини од вкупните приходи на технолошкиот гигант.

Според изворите, новиот интернет прелистувач би можел директно да интегрира производи на OпенАИ како што е „Oператор“, агент на вештачка интелигенција кој извршува задачи во име на корисникот, како што се резервации и пополнување формулари директно во рамките на веб-страниците што корисникот ги посетува.