Постојат индиции дека пожарот кој што во неделата изби покрај магистралниот пат Скопје-Блаце да е подметнат, изјави денеска директорот на Дирецијата за заштита и спасување (ДЗС), Стојанче Ангелов.

Според него, на местотот биле пронајдени дрвени палети.

Првиот човек на ДЗС истакна дека на местото на избувнувањето на пожарот, видел како линијата на оган е многу широка како пожар кој би се појавил од фрлен отпушок од цигара.

„Пожарникарите при гаснење пронајдоа палети претходно најверојатно намачкани и полиени со бензин и фрлени во смреки. Некој утрово се обидуваше да го реактивира пожарот во Блаце кој е под контрола“, рече Ангелов во видео-обраќање.

Тој апелираше секој кој ќе види невообичаено однесување од други лица, кои носат или во рацете држат палети, веднаш да бидат пријавени на бројот 112.

Директорот на ДЗС демантираше дека во текот на вчерашниот ден, некои манастири или цркви биле во опасност од пожарот.

Исто така, информира Ангелов, не е точна веста дека изгореле куќи во Чучер Сандево.

Според Центарот за управување со кризи, утрово до 7 часот активни биле седум пожари во: Општина Прилеп, кај село Бешиште има приземен пожар во мешана шума, во Општина Македонски Брод помеѓу селата Црешнево и Слатин каде гори деградирана дабова шума и грмушки, во Општина Чашка под Солунска глава, меѓу изворите на Бабуна и Бабина дупка има само чад на карпест терен, Општина Чучер Сандево помеѓу селата Блаце и Чучер каде гори мешана шума и ниска вегетација, во Општина Шуто Оризари кај Њу Стар Хотел гори депонија, во Општина Дојран кај село Николич гори нискостеблеста шума и во Општина Крива Паланка кај село Жидилово гори борова шума.

До 7 часот биле изгаснати 23 пожари, еден е локализиран, и уште еден е под контрола, велат од ЦУК.