ინდოეთმა, პაკისტანის სასარგებლოდ ჯაშუშობის ბრალდებით, სულ მცირე 11 ინდოელი პირი დააკავა. დაკავებები ქაშმირში მომხდარი სისხლიანი თავდასხმის შემდეგ განხორციელდა, ხოლო ეჭვმიტანილები, სავარაუდოდ, სოციალური მედიისა და ფულადი დაპირებების საშუალებით ჩაითრიეს საჯაშუშო ქსელში.

ადგილობრივი მედიის მიერ პოლიციის წყაროებიდან მიღებული ინფორმაციის თანახმად, ინდოეთის ხელისუფლებამ პაკისტანის სასარგებლოდ ჯაშუშობის ბრალდებით დაახლოებით ათეული პირი დააკავა. ეს მოვლენა ინდოეთ-პაკისტანს შორის ბოლო წლების ყველაზე სერიოზული კონფლიქტის შემდეგ მოხდა.

NDTV-ის ორშაბათს გავრცელებული ინფორმაციით, ოფიციალურმა პირებმა განაცხადეს, რომ ჰარიანას, პენჯაბისა და უტარ-პრადეშის შტატებში ცხრა პირი დააკავეს ჯაშუშობის ბრალდებით. პენჯაბის პოლიციის გენერალურმა დირექტორმა, გაურავ იადავმა აღნიშნა, რომ მისმა გუნდმა კიდევ ორი პირი დააკავა, რომლებსაც მგრძნობიარე სამხედრო ინფორმაციის გაჟონვაში ედებათ ბრალი.

პოლიციამ განაცხადა, რომ მათ მიიღეს სანდო სადაზვერვო ინფორმაცია იმის შესახებ, რომ ეს ორი პირი 6-7 მაისის ღამეს პაკისტანის ტერიტორიაზე განხორციელებულ თავდასხმებთან დაკავშირებულ საიდუმლო ინფორმაციას აზიარებდა. პირველადი გამოძიების თანახმად, დადგინდა, რომ ეს პირები პირდაპირ კონტაქტში იმყოფებოდნენ პაკისტანის სადაზვერვო სამსახურთან და აზიარებდნენ კრიტიკულ ინფორმაციას ინდოეთის შეიარაღებულ ძალებთან დაკავშირებით.

პაკისტანს ჯაშუშობის ბრალდებებთან დაკავშირებით კომენტარი ჯერ არ გაუკეთებია.

ინდოეთის ოფიციალურ პირებს კი ბრალდებებთან დაკავშირებით დეტალები არ გაუვრცელებიათ. ჰარიანას შტატის ერთ-ერთმა პოლიციელმა Hindustan Times-თან საუბარში აღნიშნა, რომ დაკავებები უმეტესწილად სოციალურ ქსელებში აქტივობის გამო განხორციელდა.

ჰისარის რაიონის პოლიციელმა, კუმარ სავანმა განაცხადა: „ესეც ერთგვარი ომია. ისინი (პაკისტანი) სოციალური მედიის ინფლუენსერების დაქირავებით ცდილობენ საკუთარი ნარატივის გავრცელებას.“

ინდოეთის მიერ კონტროლირებად ქაშმირში 22 აპრილს განხორციელებული თავდასხმის შემდეგ დაწყებულ შეტაკებებს სულ მცირე 60 ადამიანი ემსხვერპლა. ნიუ დელიმ თავდასხმაში პაკისტანი დაადანაშაულა, ხოლო ისლამაბადმა ბრალდებები სრულად უარყო.

მოგზაური ბლოგერი დააკავეს

ჰარიანაში მოგზაური ბლოგერიც გასულ კვირას მსგავსი ბრალდებებით დააკავეს. ადგილობრივი მედიის ცნობით, პოლიციამ განაცხადა, რომ ქალი სულ მცირე ორჯერ იმყოფებოდა პაკისტანში და კონტაქტში იყო ქვეყნის საელჩოს ერთ-ერთ თანამშრომელთან.

გავრცელებული ინფორმაციით, დაკავებულთა შორის არიან სტუდენტი, უსაფრთხოების თანამშრომელი და ბიზნესმენი.

India Today-ის საინფორმაციო არხმა მსგავსად 11 პირის დაკავების შესახებ გაავრცელა ინფორმაცია. ინფორმაციაში ნათქვამია, რომ აღნიშნული პირები „სოციალური მედიის, ფინანსური წახალისების, ყალბი დაპირებების, მესენჯერული აპლიკაციებისა და პაკისტანში პირადი ვიზიტების საშუალებით ჩაითრიეს საჯაშუშო ქსელში“.

ეს დაკავებები ბირთვული იარაღის მფლობელ ორ მოსისხლე მეტოქეს შორის 1999 წლის შემდეგ მომხდარი ყველაზე სერიოზული კონფლიქტის შემდეგ განხორციელდა. ოთხდღიანმა სარაკეტო, უპილოტო და საარტილერიო თავდასხმებმა სრულმასშტაბიან ომში გადაზრდის შიში გააჩინა, თუმცა მხარეები საბოლოოდ ცეცხლის შეწყვეტაზე შეთანხმდნენ.

ქაშმირის პრობლემა

ინდოეთი და პაკისტანი 1947 წელს ბრიტანეთისგან დამოუკიდებლობის მოპოვების შემდეგ არაერთხელ შეებრძოლნენ ერთმანეთს ყოფილი სამთავროს, ქაშმირის გამო. ორ ქვეყანას შორის გამყოფი საზღვარი თაობების განმავლობაში აშორებს ოჯახებს.

1989 წლიდან ინდოეთის მიერ მართულ რეგიონში მეამბოხეები დამოუკიდებლობის ან პაკისტანთან გაერთიანების მოთხოვნით აჯანყებებს აწყობენ. ნიუ დელი, რომელიც მუსლიმებით უმრავლესობით დასახლებულ, ინდოეთის მიერ მართულ ქაშმირში დაახლოებით 500 000 ჯარისკაცს აკონტროლებს, აქ არსებულ შეიარაღებულ აჯანყებას „პაკისტანის მიერ მხარდაჭერილ ტერორიზმად“ მიიჩნევს. პაკისტანი ამ ბრალდებებს უარყოფს.

ბოლო კვირებში მოდის მთავრობის მიერ მუსლიმურ ორგანიზაციებზე, ლიტერატურასა და სკოლებზე გაზრდილმა ზეწოლამ რეგიონის მასშტაბით არეულობები გამოიწვია.

ინდოეთის მიერ სადავო რეგიონში 82 000 არა-ქაშმირელისთვის ბინადრობის მოწმობის გაცემამ მიზანმიმართული დემოგრაფიული ცვლილებების მიმართ შიში გააძლიერა.

პაჰალგამის თავდასხმის შემდეგ ინდოეთის მიერ მართულ ქაშმირში 1500-ზე მეტი ადამიანის დაკავების შემდეგ, ინდოეთის სხვადასხვა ქალაქში ვრცელდება ინფორმაცია ინდუსი მემარჯვენე ჯგუფების მიერ ქაშმირელ მუსლიმებზე — უმეტესად სტუდენტებზე — თავდასხმების შესახებ.