ამერიკის შეერთებული შტატების პრეზიდენტმა დონალდ ტრამპმა განაცხადა, რომ ჩინეთის სახალხო რესპუბლიკის პრეზიდენტ სი ძინპინთან შეთანხმების მიღწევა „უკიდურესად რთულია“. ამასობაში, ევროკავშირმა აღნიშნა, რომ ვაშინგტონთან საკუთარ სავაჭრო მოლაპარაკებებში პროგრესს მიაღწია, მაშინ როცა აშშ-ის პრეზიდენტმა გლობალური ლითონის ტარიფები გააორმაგა, რამაც ყურადღება მიიპყრო.

ტრამპის ბოლო სავაჭრო ნაბიჯები დაემთხვა პარიზში ეკონომიკური თანამშრომლობისა და განვითარების ორგანიზაციის (OECD) მინისტრების შეხვედრას, სადაც ისინი აშშ-ის მკაცრი სავაჭრო მიდგომის მსოფლიო ეკონომიკაზე გავლენას განიხილავდნენ. ტრამპის მიერ მოკავშირეებისა და მეტოქეების მიმართ დაწესებულმა ფართომასშტაბიანმა ტარიფებმა სავაჭრო პარტნიორებთან ურთიერთობები დაძაბა და ამ ტარიფების თავიდან აცილების მიზნით არაერთი მოლაპარაკების დაწყებას შეუწყო ხელი.

თეთრმა სახლმა განაცხადა, რომ პრეზიდენტი ტრამპი ამ კვირაში სი ძინპინს ესაუბრება, რამაც მსოფლიოს ორ უმსხვილეს ეკონომიკას შორის სავაჭრო შეთანხმების დაჩქარების იმედები გააჩინა. თუმცა, ოთხშაბათს დილით, ტრამპმა Truth Social-ის პლატფორმაზე გამოქვეყნებული პოსტით - „მიყვარს ჩინეთის პრეზიდენტი სი, ყოველთვის მიყვარდა და ყოველთვის მეყვარება, მაგრამ ის ძალიან რთული და შეთანხმების მისაღწევად უკიდურესად რთული ადამიანია!!!“ - სწრაფი შეთანხმების მოლოდინი შეამცირა.

ჩინეთის სახალხო რესპუბლიკის საგარეო საქმეთა სამინისტროს პრესსპიკერმა, ლინ ძიანმა, რუტინულ პრესკონფერენციაზე ამ განცხადებებთან დაკავშირებით თქვა: „ჩინურ-ამერიკული ურთიერთობების განვითარების საკითხში ჩინური მხარის პრინციპები და პოზიცია თანმიმდევრულია“.

ტრამპის მიერ აპრილში დაწყებული საბაჟო ტარიფების კამპანიის მთავარი სამიზნე ჩინეთი იყო. ჩინურ საქონელზე 145%-იანი საბაჟო გადასახადი დაწესდა, რაზეც ჩინეთმა ამერიკულ საქონელზე 125%-იანი საპასუხო ტარიფით უპასუხა. თუმცა, მაისში ორივე მხარე დროებით დაძაბულობის შემცირებაზე შეთანხმდა. ტრამპმა ასევე განაცხადა, რომ სხვა ქვეყნების მიმართ ყოვლისმომცველი ზომების ამოქმედება 9 ივლისამდე გადადო.

ტრამპის ბოლო განცხადებები ალუმინსა და ფოლადზე საბაჟო ტარიფების 25%-დან 50%-მდე გაზრდიდან რამდენიმე საათში გაკეთდა. ამან სხვადასხვა სავაჭრო პარტნიორთან დაძაბულობა გაზარდა, თუმცა დიდი ბრიტანეთი ამ მაღალი ტარიფისგან გაათავისუფლა.

აშშ-ის სავაჭრო წარმომადგენელი ჯეიმსონ გრირი 38 ქვეყნის მომცველი ეკონომიკური თანამშრომლობისა და განვითარების ორგანიზაციის შეხვედრის სესიებს შორის ევროკავშირის ვაჭრობის კომისარს მაროშ შეფჩოვიჩს შეხვდა. 27-წევრიან ევროკავშირს მომავალ თვეში 50%-იანი ტარიფების ამოქმედების საფრთხე ემუქრება. შეფჩოვიჩმა განაცხადა, რომ გრირთან „ნაყოფიერი და კონსტრუქციული დისკუსია“ ჰქონდა და სოციალურ ქსელ X-ზე დაწერა: „სწორი მიმართულებით სწრაფად მივიწევთ წინ და იმპულსის შესანარჩუნებლად მჭიდრო კავშირს ვიმყოფებით“.

ევროკავშირმა გასულ თვეს გააფრთხილა, რომ ლითონზე საბაჟო ტარიფების გაორმაგება მოლაპარაკებით მიღწეული გადაწყვეტილების პოვნის მცდელობებს ძირს გამოუთხრიდა.

ფოლადის საბაჟო ტარიფები

ორგანიზაციამ სამშაბათს გლობალური ეკონომიკური ზრდის პროგნოზი შეამცირა და ამ შემცირებაში ტრამპის საბაჟო ტარიფების კამპანია დაადანაშაულა. ასევე, გერმანიის ეკონომიკის მინისტრმა, კატარინა რაიხემ, გააფრთხილა: „მოლაპარაკებით მიღწეული გადაწყვეტილებები უნდა ვიპოვოთ, რადგან დრო იწურება".

საფრანგეთის ვაჭრობის მინისტრმა, ლორან სენ-მარტენმა კი თქვა: "სიმშვიდე უნდა შევინარჩუნოთ და ყოველთვის ვაჩვენოთ, რომ ეს ტარიფები არავის ინტერესებში არ შედის".

კანადამ, აშშ-ის ლითონის უმსხვილესმა მიმწოდებელმა, ტრამპის ტარიფებს "უკანონო და უსამართლო" უწოდა. სამშაბათს, დიდი ბრიტანეთის ვაჭრობის მინისტრ ჯონათან რეინოლდსსა და გრირს შორის გამართული მოლაპარაკებების შემდეგ, ლონდონმა განაცხადა, რომ დიდი ბრიტანეთიდან იმპორტი ამ დროისთვის 25%-იან ნიშნულზე დარჩება. აღინიშნა, რომ ორივე მხარემ, ცოტა ხნის წინ ხელმოწერილი სავაჭრო შეთანხმების პირობების შესაბამისად, საბაჟო ტარიფებისა და კვოტების რეგულირებაზე უნდა იმუშაოს.

დიდი ბრიტანეთის მთავრობის სპიკერმა განაცხადა: „მოხარული ვართ, რომ აშშ-სთან ჩვენი შეთანხმების წყალობით, ბრიტანული ფოლადი ამ დამატებით ტარიფებს არ დაექვემდებარება“.

გავრცელდა ინფორმაცია, რომ განვითარებული ეკონომიკების მქონე დიდი ბრიტანეთის, კანადის, საფრანგეთის, გერმანიის, იტალიის, იაპონიისა და აშშ-ის შემადგენლობით არსებული „დიდი შვიდეული“ (G7) ოთხშაბათს სავაჭრო საკითხებზე ცალკე მოლაპარაკებებს გამართავს.

მექსიკამ განაცხადა, რომ უფრო მაღალი ტარიფებისგან გათავისუფლებას მოითხოვს. ეკონომიკის მინისტრმა მარსელო ებრარდმა განაცხადა, რომ ეს უსამართლოა, რადგან აშშ სამხრეთ მეზობელს იმაზე მეტ ფოლადს აწვდის ექსპორტზე, ვიდრე მისგან შემოაქვს.

ებრარდმა თქვა: „პროდუქტზე, რომელზეც სავაჭრო პროფიციტი გაქვს, ტარიფის დაწესებას ლოგიკა არ აქვს“. მექსიკა ტრამპის სავაჭრო ომების მიმართ საკმაოდ მოწყვლადია, რადგან მისი ექსპორტის 80% მთავარ პარტნიორზე, აშშ-ზე მოდის.

მიუხედავად იმისა, რომ ტრამპის ზოგიერთი ყველაზე ყოვლისმომცველი ტარიფი სამართლებრივ დავებს აწყდება, სააპელაციო პროცესის მიმდინარეობისას, ამ დროისთვის, მათი ძალაში დატოვება დაშვებულ იქნა.

თეთრი სახლის პრესმდივანმა, კეროლაინ ლევიტმა, სამშაბათს გაკეთებულ განცხადებაში დაადასტურა, რომ ტრამპის ადმინისტრაციამ მთავრობებს წერილები გაუგზავნა, რათა 9 ივლისის ბოლო ვადის მოახლოებასთან ერთად, ოთხშაბათამდე წინადადებები წარმოედგინათ.