აშშ-ის პრეზიდენტი ამტკიცებს, რომ საერთაშორისო სტუდენტები ამერიკელების ადგილებს იკავებენ; უნივერსიტეტს „კატასტროფად“ აფასებს.

აშშ-ის პრეზიდენტმა დონალდ ტრამპმა განაცხადა, რომ ჰარვარდის უნივერსიტეტმა საერთაშორისო სტუდენტების მიღების მაჩვენებელი დაახლოებით 15%-მდე უნდა შეზღუდოს და ამჟამინდელი 31%-იანი მაჩვენებელი მეტისმეტად მაღლად შეაფასა.

„ვფიქრობ, ზღვარი დაახლოებით 15% უნდა იყოს და არა 31%“, – განაცხადა ტრამპმა თეთრ სახლში ჟურნალისტებთან საუბრისას და დასძინა: „არიან ადამიანები, რომლებსაც ჰარვარდსა და სხვა უნივერსიტეტებში სურთ სწავლა, მაგრამ უცხოელი სტუდენტების გამო ვერ ახერხებენ ჩაბარებას“.

ეს განცხადებები მოჰყვა ტრამპის ადმინისტრაციის მცდელობას, გაეუქმებინა ჰარვარდისთვის საერთაშორისო სტუდენტების ჩარიცხვის უფლებამოსილება. თუმცა, მას შემდეგ, რაც უნივერსიტეტმა სარჩელი შეიტანა იმ მოტივით, რომ ეს არღვევდა აშშ-ის კონსტიტუციის პირველ შესწორებას, ფედერალურმა მოსამართლემ ეს გადაწყვეტილება დროებით დაბლოკა.

„მინდა დავრწმუნდე, რომ უცხოელი სტუდენტები არიან ადამიანები, რომლებსაც ჩვენი ქვეყანა ეყვარებათ,“ – განაცხადა ტრამპმა. „არ გვინდა ვხედავდეთ სავაჭრო ცენტრების აფეთქებას. არ გვინდა ვხედავდეთ ისეთ არეულობებს, როგორიც კამპუსებში ხდება“.

ტრამპმა, რომელმაც ჰარვარდი „კატასტროფად“ შეაფასა, განაცხადა, რომ უნივერსიტეტი უფრო გამჭვირვალე უნდა იყოს.

„ჰარვარდმა თავისი სიები უნდა გვაჩვენოს. მათ ჰყავთ უცხოელი სტუდენტები, მათი სტუდენტების დაახლოებით 31% უცხოური წარმოშობისაა. თითქმის 31%. გვინდა ვიცოდეთ, საიდან არიან ეს სტუდენტები. პრობლემების შემქმნელები არიან? რომელი ქვეყნებიდან არიან ისინი“? – განაცხადა მან.

კითხვაზე, თუ როგორ დასრულდება ეს დაძაბულობა ჰარვარდთან, ტრამპმა უპასუხა: „არ ვიცი. ჰარვარდმა თავი ხელში უნდა აიყვანოს. ჰარვარდი დიდ უპატივცემულობას იჩენს ჩვენი ქვეყნის მიმართ და ერთადერთი, რასაც აკეთებენ, უფრო ღრმად ეფლობიან“.

ტრამპსა და ჰარვარდს შორის კონფლიქტი

ტრამპსა და ჰარვარდს შორის დაძაბულობა პრეზიდენტის განცხადებით დაიწყო, რომ ის აშშ-ის კამპუსებში პალესტინის მხარდამჭერ პროტესტებს ჩაახშობდა.

ტრამპმა, კოლუმბიის უნივერსიტეტიდან დაწყებული, პალესტინის მხარდამჭერი პროტესტები სამიზნეში ამოიღო და უნივერსიტეტის 400 მილიონი დოლარის ფედერალური დაფინანსება გააუქმა. ამან გამოიწვია პალესტინის მხარდამჭერი პროტესტების ზრდა აშშ-ის კამპუსებში.

საბოლოოდ, კოლუმბიის უნივერსიტეტი ტრამპის ზეწოლას დაემორჩილა და გამოაცხადა პოლიტიკის ფართომასშტაბიანი ცვლილებები, მათ შორის კამპუსში საპროტესტო აქციების პოლიტიკასთან დაკავშირებით.

მოგვიანებით ტრამპმა, იმ მოტივით, რომ მათ პალესტინის მხარდამჭერი პროტესტების გამართვის უფლება მისცეს, კორნელისა და ნორთვესტერნის უნივერსიტეტების ფედერალური დაფინანსება გაყინა.

რაც შეეხება ჰარვარდს, უნივერსიტეტმა აპრილის დასაწყისში ტრამპის მოთხოვნები უარყო და მოგვიანებით ადმინისტრაციას დაახლოებით 2,3 მილიარდი დოლარის დაფინანსების შეჩერების გამო უჩივლა.