საგარეო საქმეთა მინისტრმა ჰაქან ფიდანმა ალჟირში ოფიციალური ვიზიტის დროს ხაზი გაუსვა პალესტინისადმი, რეგიონული სტაბილურობისა და ეკონომიკური ზრდისადმი საერთო ერთგულებას.

საგარეო საქმეთა მინისტრმა ჰაქან ფიდანმა გაკეთებულ განცხადებაში თქვა, რომ თურქეთი და ალჟირი მტკიცედ არიან განწყობილი, გააძლიერონ სტრატეგიული პარტნიორობა, განსაკუთრებით რეგიონული დიპლომატიის, ვაჭრობისა და ჰუმანიტარული საკითხების სფეროებში.

ორშაბათს ალჟირის პრეზიდენტ აბდელმაჯიდ ტებუნთან გამართული შეხვედრის შემდეგ ფიდანმა ხაზი გაუსვა ანკარასა და ალჟირს შორის უფრო ღრმა კონსულტაციების საჭიროებას.

„თურქეთსა და ალჟირს გვსურს გავააქტიუროთ ჩვენი კონსულტაციები რეგიონულ საკითხებზე და შევიმუშაოთ საერთო პოლიტიკა“, - განაცხადა მან.

ფიდანმა აღნიშნა, რომ ორივე ქვეყანას ბევრ გლობალურ საკითხში, ღაზაში მიმდინარე ომის ჩათვლით, საერთო ხედვა აქვს.

საერთო პოზიცია ღაზასთან და პალესტინასთან სოლიდარობის შესახებ

ფიდანმა ღაზაში არსებული მდგომარეობა გენოციდად შეაფასა და კიდევ ერთხელ დაადასტურა ორივე ქვეყნის მხარდაჭერა პალესტინისადმი.

„ჩვენი ამჟამინდელი უმნიშვნელოვანესი დღის წესრიგია ჰუმანიტარული დახმარების ღაზაში მიწოდება და ცეცხლის შეწყვეტის დამყარება. თურქეთი გააგრძელებს მოძმე პალესტინელი ხალხის ყველაზე მტკიცე მხარდაჭერას. ჩვენს ალჟირელ ძმებსაც კიდევ ერთხელ ვუხდი მადლობას პალესტინის საქმის მხარდაჭერისთვის“, - თქვა მან.

საპრეზიდენტო ვიზიტი დღის წესრიგშია

ფიდანმა გამოაცხადა, რომ მოსალოდნელია პრეზიდენტ ტებუნის ვიზიტი თურქეთში მიმდინარე წელს, სადაც ის დაესწრება მაღალი დონის სტრატეგიული თანამშრომლობის საბჭოს მომდევნო სხდომას. აღინიშნა, რომ ეს ვიზიტი ორმხრივ ურთიერთობებს კიდევ უფრო გაამყარებს.

ფიდანმა შეაქო ალჟირის მზარდი როლი გლობალურ დიპლომატიასა და რეგიონული სტაბილურობის უზრუნველყოფაში პრეზიდენტ ტებუნის ხელმძღვანელობით.

„ალჟირი თავისი შესაძლებლობებითა და რესურსებით ამ რეგიონში სტაბილურობის ერთ-ერთ გარანტად იქცა. ჩვენ ასევე კმაყოფილებით ვადევნებთ თვალს ალჟირის, როგორც გაეროს უშიშროების საბჭოს (გაეროს უსაბ) დროებითი წევრის, საქმიანობას“, - განაცხადა მან.

ფიდანმა ასევე მიესალმა ალჟირის წარმატებას რეგიონული პრიორიტეტების გლობალურ დონეზე წარმოდგენის კუთხით.

ორმხრივი ნდობა - ორმხრივი ურთიერთობების ქვაკუთხედი

ფიდანმა ხაზი გაუსვა თურქეთსა და ალჟირს შორის არსებულ მტკიცე კავშირს და აღნიშნა, რომ ორმხრივი ნდობა ორმხრივი ურთიერთობების ქვაკუთხედია.

„ჩვენ ყველა საკითხში ვენდობით ალჟირს. თურქეთიც ყოველთვის იქნება ალჟირისთვის სანდო მეგობარი“, - განაცხადა მან.

ფიდანმა დასძინა, რომ ალჟირის საგარეო საქმეთა მინისტრ აჰმედ ატაფთან და პრეზიდენტ ტებუნთან გამართულმა შეხვედრებმა დაადასტურა, რომ თანამშრომლობის საკითხში იგივე ძლიერი ნება ალჟირის მხარესაც არსებობს.

ეკონომიკური და სტრატეგიული პარტნიორობის გაძლიერება

ორშაბათს გამართულ ერთობლივი დაგეგმვის ჯგუფის შეხვედრაზე, ორივე ქვეყნის დელეგაციებმა განიხილეს შესაძლებლობები სხვადასხვა სექტორში, როგორიცაა ვაჭრობა, ტრანსპორტი, ჯანდაცვა და მიგრაცია.

ფიდანმა ხაზი გაუსვა ორმხრივი სავაჭრო ბრუნვის 10 მილიარდ დოლარამდე გაზრდის პოტენციალს და აღნიშნა, რომ 1000-ზე მეტ თურქულ კომპანიას ამჟამად შეაქვს წვლილი ალჟირის ეკონომიკასა და დასაქმებაში.

„ვაჭრობისა და ინვესტიციების ორმხრივი წახალისების შესახებ გასაფორმებელი შეთანხმებებით ჩვენს ეკონომიკურ კავშირებს კიდევ უფრო გავაღრმავებთ“, - განაცხადა მან.

ფიდანმა ასევე დაასახელა ენერგეტიკისა და თავდაცვის სფეროები თანამშრომლობის საკვანძო მიმართულებებად: „ალჟირი ენერგეტიკული უსაფრთხოების თვალსაზრისითაც ჩვენი ერთ-ერთი მნიშვნელოვანი პარტნიორია. გვსურს ამ სფეროში ჩვენი ურთიერთობები კიდევ უფრო გავაძლიეროთ. ასევე, გავაგრძელებთ თანამშრომლობას თავდაცვის მრეწველობის სფეროშიც“.