მიუხედავად იმისა, რომ მატჩი მიუნხენში ტარდება, ოფიციალური პირები აცხადებენ, რომ პსჟ-ს გამარჯვებამ შესაძლოა კლუბის მშობლიურ ქალაქ პარიზში ზეიმი და მოსალოდნელი არეულობები გამოიწვიოს.

პარიზის პოლიციის უფროსმა, ლორან ნუნიესმა, პარასკევს ფრანგულ სამაუწყებლო კომპანია Cnews-თან ინტერვიუში განაცხადა: პარიზი შაბათს პარი სენ-ჟერმენსა და მილანის ინტერს შორის გასამართი უეფას ჩემპიონთა ლიგის ფინალისთვის 5,400 პოლიციელის მობილიზებას მოახდენს.

ნუნიესმა, ასევე პარასკევს, გაზეთ Le Parisien-თან ცალკე ინტერვიუში განაცხადა: „დედაქალაქსა და მის შემოგარენში დიდი ძალების განლაგება იგეგმება, 5,400 თანამშრომელი იქნება მობილიზებული... ეს ნამდვილად მასშტაბურია“.

მისი თქმით, პოლიციელთა დიდი ნაწილი საფრანგეთის დედაქალაქის ელისეის მინდვრებზე და ქალაქის სამხრეთ-დასავლეთ ნაწილში მდებარე პსჟ-ს საშინაო არენის, პარკ დე პრენსის სტადიონის, მიმდებარედ განლაგდება.

შეხვედრა ევროპული საფეხბურთო სეზონის კულმინაციაა და პსჟ-ს, დიდი დანახარჯების მიუხედავად, ევროპული საკლუბო ფეხბურთის ყველაზე პრესტიჟული ტიტული არასდროს მოუგია. ეს მატჩი პსჟ-სთვის იქნება მხოლოდ მეორე ფინალი მას შემდეგ, რაც 2011 წელს კატარელმა ინვესტორებმა ფრანგული დედაქალაქის გუნდი შეიძინეს და გარდაქმნეს.

უსაფრთხოების ზომები

ლუის ენრიკეს გუნდი, შაბათ საღამოს იტალიურ გიგანტ „ინტერთან“ გასამართი შეხვედრის შედეგის მიუხედავად, ღამეს მიუნხენში გაატარებს და – როგორც გულშემატკივრები იმედოვნებენ – საფრანგეთში პირველი ჩემპიონთა ლიგის თასით დაბრუნდება.

პროგრამა შესაძლოა შეიცვალოს, თუმცა გუნდის ჩამოსვლა რუასი-შარლ დე გოლის აეროპორტში კვირას, 15:30-დან 16:00 საათამდეა მოსალოდნელი და მათ პირდაპირ ასაფრენი ბილიკიდან, ფრანგი გულშემატკივრების თვალისგან მოშორებით, წაიყვანენ.

თუ პსჟ გაიმარჯვებს, კვირას, დღის მეორე ნახევარში, ელისეის მინდვრების რაიონში საზეიმო აღლუმის გამართვა იგეგმება.

ამ კვირის დასაწყისში ლივერპულში მომხდარი ინციდენტის შემდეგ, როდესაც ავტომობილი ფეხბურთის გულშემატკივრებში შევარდა, პარიზის პოლიციის უფროსმა ლორან ნუნიესმა განაცხადა, რომ ქალაქის ერთ-ერთი ყველაზე ცნობილი ღირსშესანიშნაობის, ტრიუმფალური თაღის, მიმდებარედ მოძრაობა შაბათს, შუადღიდან შეიზღუდება, ხოლო იმავე საღამოს ელისეის მინდვრები და მიმდებარე ქუჩებიც გადაიკეტება.

პსჟ-ს მიერ ამ თვის დასაწყისში „არსენალთან“ გამარჯვებით ფინალში გასვლას პარიზში ერთღამიანი არეულობა მოჰყვა; 47 ადამიანი დააკავეს, სამი კი ავტომობილის დაჯახების შედეგად დაშავდა. ნუნიესმა თქვა: „ამ შაბათს, 18:00 საათიდან ელისეის მინდვრებსა და მასთან დაკავშირებულ ქუჩებზე მოძრაობა აღარ იქნება.“