ადგილობრივი მედიის ინფორმაციით, ისრაელელმა ოფიციალურმა პირმა განაცხადა, რომ თავდასხმები დამოუკიდებლად ირანის ფორდოს ბირთვული ობიექტის პარალიზებას ვერ შეძლებს. ამასთან, „მე-13 არხმა“ მიანიშნა, რომ ტრამპის პოზიციის ცვლილება შესაძლოა აშშ-ის ომში ჩართვის სიგნალი იყოს.

ისრაელის მედია იუწყება, რომ ისრაელი ელოდება, აშშ შეუერთდება მის უპრეცედენტო თავდასხმებს ირანის წინააღმდეგ.

თელ-ავივში გაკეთებული შეფასებების თანახმად, მაღალი რანგის ისრაელელმა ოფიციალურმა პირმა ისრაელის საზოგადოებრივ მაუწყებელ „KAN“-ს განუცხადა, რომ მოსალოდნელია, აშშ-ის პრეზიდენტმა დონალდ ტრამპმა ირანზე თავდასხმებში ამერიკული ძალების მონაწილეობა დაამტკიცოს.

„ტრამპს სურს, რომ ის ისტორიაში შევიდეს არა როგორც გვერდიდან მაყურებელი, არამედ როგორც ამ პროცესის ნაწილი,“- განაცხადა ოფიციალურმა პირმა.

მან ასევე დასძინა: „აშშ-ის გარეშე, ჩვენ ფორდოს ბირთვულ ობიექტს მხოლოდ შეზღუდულ ზიანს მივაყენებთ.“

ისრაელის „მე-13 არხმა“ აღნიშნა, რომ ტრამპის პოზიციის ცვლილებები შესაძლოა კამპანიაში მონაწილეობის განზრახვაზე მიუთითებდეს.

არხი ასევე იუწყება, რომ ისრაელი ემზადება შესაძლო თავდასხმისთვის ფორდოს ბირთვულ ობიექტზე, რომელიც ირანის ერთ-ერთი ყველაზე დაცული და მნიშვნელოვანი ობიექტია.

ფორდო ისრაელის არმიის სამიზნეების სიაშია და ისრაელმა განაცხადა, რომ თავდასხმის დროს თავად განსაზღვრავს.

თუმცა, ოფიციალურმა პირებმა აღიარეს, რომ აშშ-ის მონაწილეობის გარეშე თავდასხმის ხარისხი უფრო დაბალი იქნება.

ნეთანიაჰუს წახალისება აშშ-ის როლის გაზრდისკენ

ისრაელის თავდაცვის მინისტრმა, ისრაელ კაცმა, სამშაბათს უსაფრთხოების საკითხების შეფასებისას ამ თემაზე ისაუბრა და აღნიშნა, რომ ერთის მხრივ, პრემიერ-მინისტრ ბენიამინ ნეთანიაჰუსა და სტრატეგიულ საკითხთა მინისტრ რონ დერმერსა და, მეორეს მხრივ, ტრამპს შორის პირდაპირი კომუნიკაცია მიმდინარეობს.

გაზეთი „ისრაელ ჰაიომი“ კონფლიქტში აშშ-ის მონაწილეობის მნიშვნელობას უსვამს ხაზს: „ისრაელმა ირანის ბირთვული ობიექტების უმეტესობა, ფორდოს გარდა, სამიზნეში ამოიღო. ფორდო მთის შიგნით, 90 მეტრის სიღრმეზეა განთავსებული.“

გაზეთი დასძენს, რომ მხოლოდ აშშ ფლობს B-2 ბომბდამშენებს, რომლებსაც შეუძლიათ ასეთ სიღრმეზე ჩაფლული სამიზნეების გარღვევა და განადგურება.

B-2 არის შორი მოქმედების, მრავალფუნქციური ბომბდამშენი, რომელსაც როგორც ჩვეულებრივი, ისე ბირთვული იარაღის ტარება შეუძლია.

ამავე კონტექსტში, ნეთანიაჰუმ განაცხადა: „საფრთხე, რომლის წინაშეც ახლა ვდგავართ, ირანია. ან ჩვენ, ან ისინი.“

„ჩვენ ვიხილავთ ახალ რეალობას, ახლო აღმოსავლეთს, როგორიც აქამდე არ გვინახავს,“ - დასძინა მან.

რეგიონული დაძაბულობა მას შემდეგ გამწვავდა, რაც ისრაელმა პარასკევს ირანის მასშტაბით სამოქალაქო, სამხედრო და ბირთვულ ობიექტებზე კოორდინირებული საჰაერო იერიშები დაიწყო, რამაც თეირანის მხრიდან საპასუხო თავდასხმები გამოიწვია.

ირანის განცხადებით, ისრაელის თავდასხმის შედეგად სულ მცირე 224 ადამიანი დაიღუპა და 1400-ზე მეტი დაშავდა.

ისრაელის ოფიციალური პირების თქმით კი, ირანის სარაკეტო თავდასხმებს სულ მცირე 24 ადამიანი ემსხვერპლა, ასობით კი დაშავდა.