ტრამპის ადმინისტრაცია აშშ-ის საიმიგრაციო და საბაჟო აღსრულების სამსახურის (ICE) საიმიგრაციო ოპერაციების მხარდასაჭერად, ფლორიდის შტატში დაახლოებით 200 საზღვაო ქვეითს გზავნის. ამის შესახებ აშშ-ის ჩრდილოეთ სარდლობამ (USNORTHCOM) განცხადება გაავრცელა.

„ჩრდილოეთ კაროლინაში მდებარე Marine Corps Air Station New River-დან Marine Wing Support Squadron 272-ეს  200 საზღვაო ქვეითი ფლორიდაში მიემგზავრება ICE-ის შიდა საიმიგრაციო აღსრულების მისიის მხარდასაჭერად. ეს მხარდაჭერა მიზნად ისახავს ICE-ის მიერ განსაზღვრულ ადგილებში კრიტიკულად მნიშვნელოვანი ადმინისტრაციული და ლოგისტიკური შესაძლებლობების უზრუნველყოფას“, — აღნიშნა USNORTHCOM-მა ხუთშაბათს გაკეთებულ განცხადებაში.

„ეს საზღვაო ქვეითები წარმოადგენენ აშშ-ის ჩრდილოეთ სარდლობის (USNORTHCOM) მიერ ICE-ის ამ მისიისთვის გაწეული მხარდაჭერის პირველ ტალღას.“

განცხადებაში ნათქვამია, რომ მხარდაჭერა ასევე გაეწევა ლუიზიანასა და ტეხასის შტატებსაც. ასევე, აღინიშნა, რომ საზღვაო ქვეითების მოვალეობები მხოლოდ ადმინისტრაციული და ლოგისტიკური საქმიანობით შემოიფარგლება და მათ ეკრძალებათ პირდაპირი კონტაქტი ICE-ის ზედამხედველობის ქვეშ მყოფ პირებთან.

არეულობა ლოს-ანჯელესში

ეს განცხადება გაკეთდა კალიფორნიის ქალაქ ლოს-ანჯელესში ჩატარებული საიმიგრაციო ოპერაციებიდან რამდენიმე კვირის შემდეგ, რომელიც ICE-ის აგენტებსა და მომიტინგეებს შორის ძალადობრივ შეტაკებებში გადაიზარდა.

პირველი შეტაკებების შემდეგ, ტრამპმა ლოს-ანჯელესში, აშშ-ის სიდიდით მეორე ქალაქში, ეროვნული გვარდიისა და საზღვაო ქვეითების განლაგების შესახებ განაცხადა. ამ ძალებმა სამოქალაქო პირების დაკავებით ქალაქში დიდი არეულობა გამოიწვიეს.

კალიფორნიის გუბერნატორი გევინ ნიუსომი და ლოს-ანჯელესის მერი კარენ ბასი ლოს-ანჯელესში სამხედრო ძალის გამოყენებას შეეწინააღმდეგნენ და პრეზიდენტი „ლოს-ანჯელესის უკანონო მილიტარიზაციაში“ დაადანაშაულეს.

მოგვიანებით ტრამპმა ICE-ს, დემოკრატების მიერ კონტროლირებად ქალაქებში საიმიგრაციო ოპერაციების გაფართოება დაავალა, რაც იმაზე მიანიშნებდა, რომ ლოს-ანჯელესის არეულობა შესაძლოა სხვა ქალაქებშიც განმეორებულიყო.