მალაიზიის პრემიერ-მინისტრი ანვარ იბრაჰიმი, როგორც მორიგე თავმჯდომარე, სამიტს ხელმძღვანელობს.

სამხრეთ-აღმოსავლეთ აზიის ქვეყნების ასოციაციის (ASEAN-ის) 46-ე სამიტი მალაიზიის დედაქალაქ კუალა-ლუმპურში დაიწყო, სადაც რეგიონის ლიდერები შეიკრიბნენ ისეთი მნიშვნელოვანი რეგიონული და გლობალური საკითხების განსახილველად, როგორიცაა აშშ-ის ტარიფები, მიანმარში მიმდინარე კონფლიქტი და სამხრეთ ჩინეთის ზღვაში არსებული საზღვაო დავები.

Malay Mail-ის ინფორმაციით, ღონისძიება, სადაც ლიდერები განიხილავენ რეგიონული ერთიანობის განმტკიცების ძალისხმევას, სტრატეგიულ პრიორიტეტებსა და არსებულ გამოწვევებს, ორშაბათს ASEAN-ის ტრადიციული ხელის ჩამორთმევით დაიწყო.

მალაიზიის პრემიერ-მინისტრმა ანვარ იბრაჰიმმა, რომელიც სამიტს მორიგე თავმჯდომარის რანგში ხელმძღვანელობს, თავის მისასალმებელ სიტყვაში აღნიშნა, რომ მან აშშ-ის პრეზიდენტ დონალდ ტრამპს წერილი მისწერა, რათა წელს ASEAN-აშშ-ის სამიტი გაიმართოს და მოითხოვა სატარიფო პრობლემების მოგვარება. „ნამდვილად, გეოპოლიტიკურ წესრიგში გარდამავალი პერიოდი მიმდინარეობს და გლობალური სავაჭრო სისტემა კიდევ უფრო რთულდება აშშ-ის მიერ ცალმხრივი ტარიფების დაწესებით“, - თქვა ანვარმა და დასძინა, რომ პროტექციონისტული პოლიტიკა კვლავ იჩენს თავს და მრავალმხრივობა „ნაკერებზე ირღვევა“.

ASEAN-ის წევრი ქვეყნები დაზარალდნენ აშშ-ის ტარიფებით, რომლებიც 10%-დან 49%-მდე მერყეობდა. თუმცა, მას შემდეგ, რაც ტრამპმა გასულ თვეს ტარიფებზე 90-დღიანი პაუზა გამოაცხადა, ქვეყნებმა ვაშინგტონთან მოლაპარაკებები სწრაფად დაიწყეს.

ანვარმა ასევე განაცხადა, რომ ASEAN-ს აქვს შესაძლებლობა გაუძლოს გეოპოლიტიკურ დაძაბულობას, რომელიც გამოწვეულია დიდი სახელმწიფოების „თვითნებური ქმედებებით“.

კუალა-ლუმპურის დეკლარაცია

ანვარმა თქვა, რომ სამხრეთ-აღმოსავლეთ აზიის რეგიონი ყოველთვის ინკლუზიურობის, კანონის უზენაესობისა და ღია ვაჭრობის საფუძველზე იზრდებოდა, მაგრამ „კეთილდღეობა ახლა საფრთხის ქვეშაა“.

„ასეან-ისთვის ჩვენი მშვიდობა, სტაბილურობა და კეთილდღეობა ჩვეულებრივ დამოკიდებული იყო ღია, ინკლუზიურ და წესებზე დაფუძნებულ საერთაშორისო წესრიგზე, რომელიც თავისუფალ ვაჭრობას, კაპიტალისა და ადამიანების ნაკადს ემყარებოდა“, - აღნიშნა პრემიერ-მინისტრმა და ხაზი გაუსვა, რომ ეს საფუძვლები ახლა თვითნებური ქმედებების გავლენით ინგრევა, მაგრამ მას სჯერა ასოციაციის „მდგრადობისა და გამძლეობის“.

ანვარმა ასევე ყურადღება გაამახვილა ASEAN-ის მიერ მეგობარ ქვეყნებთან თანამშრომლობის გაძლიერების მნიშვნელობაზე. მან ხაზი გაუსვა, რომ ჩინეთი რეგიონის უმსხვილესი ეკონომიკური პარტნიორია და ყურის თანამშრომლობის საბჭოსთან (GCC) ერთად გამართული პირველი ASEAN-ჩინეთი-GCC სამიტის მნიშვნელობას.

სამიტი ასევე მოიცავს შეხვედრებს ASEAN-ის ლიდერებს, ASEAN-ის საპარლამენტთაშორისო ასამბლეის წარმომადგენლებს, ASEAN-ის ახალგაზრდობის წარმომადგენლებსა და ASEAN-ის ბიზნეს საკონსულტაციო საბჭოს წარმომადგენლებს შორის.

მოსალოდნელია, რომ დღის მთავარი მოვლენა იქნება კუალა-ლუმპურის დეკლარაციის „ASEAN-ი 2045: ჩვენი საერთო მომავალი“ ხელმოწერა.

ასეანი არის 10-წევრიანი საერთაშორისო ორგანიზაცია, რომელიც შედგება ინდონეზიის, ვიეტნამის, ლაოსის, ბრუნეის, ტაილანდის, მიანმარის, ფილიპინების, კამბოჯის, სინგაპურისა და მალაიზიისგან.