აშშ-ის პრეზიდენტმა დონალდ ტრამპმა განაცხადა, რომ ისრაელის პრემიერ-მინისტრ ბენიამინ ნეთანიაჰუს უთხრა, თურქეთთან შესაძლო ნებისმიერ უთანხმოებაში „გონივრული უნდა იყოს“. ტრამპმა ასევე შეაქო თურქეთის პრეზიდენტ რეჯეფ თაიფ ერდოღანთან ურთიერთობაც და აღნიშნა, რომ სჯერა შეძლებს მათ შორის არსებული პრობლემების მოგვარებას.

ტრამპმა, რომელმაც ნეთანიაჰუს თეთრ სახლში, ოვალურ კაბინეტში უმასპინძლა, ჟურნალისტებს განუცხადა: „თუ თურქეთთან პრობლემა გაქვს, ვფიქრობ, ამის მოგვარებას შევძლებ. რა თქმა უნდა, თუ შენც გონივრული იქნები. გონივრული უნდა იყო. ჩვენ ყველანი გონივრულები უნდა ვიყოთ.“

ტრამპმა, ნეთანიაჰუსადმი მიმართვისას თქვა: „ბიბი, თუ თურქეთთან პრობლემა შეგექმნება, მჯერა, რომ ამის მოგვარებას შევძლებ. თურქეთთან და მის ლიდერებთან ძალიან, ძალიან კარგი ურთიერთობები მაქვს. ჩვენ შეგვიძლია ამ პრობლემის დაძლევა. ამიტომ, იმედი მაქვს, ეს პრობლემა არ იქნება. არც მგონია, რომ იქნება“. ტრამპმა ნეთანიაჰუსადმი მიმართვისას ისრაელის პრემიერ-მინისტრის მეტსახელი „ბიბი“ გამოიყენა.

ტრამპმა ასევე ხაზგასმით აღნიშნა, რომ პრეზიდენტ ერდოღანთან „შესანიშნავი ურთიერთობები“ აქვს და ის დაახასიათა როგორც „მკაცრი, მაგრამ ძალიან ჭკვიანი“. ტრამპმა თქვა, რომ ერდოღანმა „შეძლო ის, რაც სხვამ ვერავინ შეძლო“; ამით მან კიდევ ერთხელ გამოხატა რწმენა, რომ გასული წლის დეკემბერში სირიის ყოფილი ლიდერის ბაშარ ალ-ასადის დამხობაში თურქეთმა საკვანძო როლი ითამაშა.

ტრამპმა, რომელმაც მანამდე თურქეთი „კარგ ქვეყნად“, ხოლო პრეზიდენტი ერდოღანი „კარგ ლიდერად“ დაახასიათა, ელჩობის კანდიდატებთან შეხვედრისას თურქეთი შეაქო და თქვა: „კარგი ადგილია, ლიდერიც კარგი ჰყავს“.