სლოვენიამ განაცხადა, რომ ღაზაში მიმდინარე ომის გამო ისრაელთან იარაღით ვაჭრობას სრულად კრძალავს, რითაც ის ევროკავშირის ქვეყნებს შორის პირველი გახდა. ისრაელის ხშირი კრიტიკოსი სლოვენიის მთავრობა, გასულ წელს ღაზაში ომის რაც შეიძლება მალე დასრულების მიზნით, პალესტინის სახელმწიფოს აღიარების ნაბიჯებს დგამდა.

ხუთშაბათს ღამით გაკეთებულ განცხადებაში ნათქვამია: „სლოვენია პირველი ევროპული ქვეყანაა, რომელმაც აკრძალა იარაღის იმპორტი, ექსპორტი და ტრანზიტი ისრაელთან“.

განცხადებაში აღნიშნულია, რომ ევროკავშირმა „შიდა უთანხმოებისა და ერთიანობის ნაკლებობის გამო კონკრეტული ზომების მიღება ვერ შეძლო“, რის გამოც სლოვენია „დამოუკიდებლად“ მოქმედებდა.

განცხადებაში ასევე ხაზგასმულია, რომ ღაზაში ამ დამანგრეველი ომის პირობებში, სადაც „ადამიანები იღუპებიან, რადგან სისტემატურად ართმევენ ჰუმანიტარულ დახმარებას“, „ყოველი პასუხისმგებლიანი სახელმწიფოს ვალია იმოქმედოს, თუნდაც ეს სხვებზე წინ ერთი ნაბიჯის გადადგმას ნიშნავდეს“.

მთავრობის ცნობით, კონფლიქტის გამო 2023 წლის ოქტომბრიდან ისრაელში სამხედრო იარაღისა და აღჭურვილობის ექსპორტზე არცერთი ლიცენზია არ გაცემულა.

სლოვენიამ, ივლისის დასაწყისში, ასევე ევროკავშირში პირველმა, ქვეყანაში შესვლა აუკრძალა ორ ულტრამემარჯვენე ისრაელელ მინისტრს. ორივე ისრაელელი მაღალჩინოსანი „პერსონა ნონ გრატად“ გამოცხადდა და მათ ბრალი დასდეს „გენოციდური განცხადებებით“ „პალესტინელების მიმართ უკიდურესი ძალადობისა და ადამიანის უფლებების სერიოზული დარღვევების წაქეზებაში“.

2024 წლის ივნისში სლოვენიის პარლამენტმა მიიღო დადგენილება პალესტინის სახელმწიფოს აღიარების შესახებ. ეს ნაბიჯი მოჰყვა ირლანდიის, ნორვეგიისა და ესპანეთის ანალოგიურ ქმედებებს, რაც ნაწილობრივ განპირობებული იყო 2023 წლის 7 ოქტომბრის შემდეგ ღაზის სექტორის უწყვეტი დაბომბვის მიმართ გამოხატული რეაქციებით.