Ирандык ракеталар Израил менен болгон 12 күндүк согуш учурунда түздөн-түз беш аскердик объектти урганын радар маалыматтары көрсөттү.

Британиялык The Telegraph гезити жарыялаган жана АКШнын Орегон мамлекеттик университетинин окумуштуулары тарабынан изилденген маалыматтарга ылайык, Тегеран тарабынан атылган алты ракета Израилдин түндүк, түштүк жана борбордук бөлүктөрүндөгү беш базага тийген.

Бутага алынган объекттердин арасында ири аба базасы, чалгындоо борбору жана логистика базасы болгонун маалыматтар көрсөттү.

Израил бийлиги бул чабуулдар тууралуу эч кандай маалымат жарыялаган жок, анткени Тель-Авив аскердик объекттер тууралуу маалыматтын жарыяланышына тыюу салат.

Абадан коргонуу системаларын тешип өтүү

The Telegraph гезитинин баамында, ирандык ракеталардын 16 пайызы Израилге жетип, абадан коргонуу системаларын тешип өткөн. Бул Израиль армиясы билдирген 87 пайыздык ийгилик көрсөткүчүнө шайкеш келет.

Израиль менен Ирандын ортосундагы кагылышуу 13-июнда Израилдин Ирандын аскердик, өзөктүк жана жарандык объекттерине абадан сокку уруулары менен башталган. Бул чабуулдарда кеминде 935 адам каза болуп, Ирандын Саламаттыкты сактоо министрлигинин маалыматы боюнча 5332 адам жаракат алган.

Тегеран жооп катары ракета жана учкучсуз учуучу аппараттар менен чабуулдарын жасаганда кеминде 29 адам каза таап, 3400дөн ашуун адам жаракат алганын Кудстагы Еврей университети билдирген.

Кагылышуу 24-июнда АКШ ортомчулук кылган ок атышууну токтотуу келишими менен аяктаган.