د امریکا ولسمشر ډونالډ ټرمپ وویل چې د مکرون لخوا فلسطین د په رسمیت پیژندولو د پریکړې په اړه کومه ستونزه نشته او د انګلستان لومړی وزیر هم د ورته ګام پورته کولو په خاطر تر فشار لاندې دی.
د امریکا ولسمشر ډونالډ ټرمپ ویلي چې د فرانسې ولسمشر ایمانویل مکرون پرېکړه چې د فلسطین دولت په رسمیت وپېژني، "ښه" پریکړه ده او دا "د هغه خپله پرېکړه ده."
ټرمپ د ګلاسګو پریسټویک هوایي ډګر ته له رسېدو وروسته خبریالانو ته وویل: "دا هغه څه دي چې هغه یې کوي؛ پدې کې کومه ستونزه نشته. دا د هغه خپله پرېکړه ده، زما پرېکړه نه ده."
ټرمپ د بریتانیا د لومړي وزیر کییر سټارمر په اړه هم تبصره وکړه او ویې ویل: "هغه زما په پرتله لږ څه زیات لیبرال دی، خو زه هغه خوښوم."
د امریکا ولسمشر ډونالد ټرمپ د یو پنځه ورځني سفر په ترڅ کې سکاټلینډ ته تللی دی ، چې په ترڅ کې به یو نوی ګالف میدان پرانیزي او د سټارمر او د اروپایي کمېسیون له مشرې اورسولا فون دیر لاین سره به غونډې وکړي.
د سټارمر پر وړاندې زیاتېدونکی فشار
مکرون د پنجشنبې په ورځ اعلان وکړ چې فرانسه به د ملګرو ملتونو د عمومي غونډې پر مهال چې په سپټمبر کې جوړیږي د فلسطین دولت په رسمي ډول په رسمیت وپېژني.
دغه ګام د اسرائیل له سخت غبرګون او پراخ نړیوال پام سره مخ شوی دی.
په ورته وخت کې، پر سټارمر فشار زیات شوی چې ورته ګام پورته کړي.
د راپورونو له مخې، د هغه د کابینې څو لوړپوړي غړيو د روغتیا وزیر ویس سټریټینګ، د عدلیې وزیره شبانه محمود، د شمالي ایرلنډ وزیر هیلیري بین، او د کلتور وزیرې لیزا نینډي له لومړي وزیر څخه غوښتنه کړې چې د فلسطین دولت په رسمیت وپېژني.
ویل کیږي دا هغه څه دي چې د مکرون د اعلان وروسته شوې. سرچینې وایي چې د مکرون دا پریکړه هم ددې لپاره شوې چې سټارمر وهڅوي چې په ګډه د فلسطین په رسمیت پېژندنه وکړي.
د انګلستان په پارلمان کې له نهه سیاسي ګوندونو څخه څه باندې ۲۲۰ غړو یوه لیک لاسلیک کړی چې له حکومت څخه یې غوښتي چې ژر تر ژره اقدام وکړي، د دې هېواد تاریخي رول او د ۱۹۸۰ راهیسې د دوه دولتونو د حل ملاتړ په پام کې ونیسي.
د پارلمان د بهرنیو چارو د کمېټې مشره ایملي تورنبري وایي: "حکومت تل ډېر لږ او ډېر ناوخته عمل کړی دی."
د کارګر ګوند غړې سارا چیمپین، چې دغه ګډ لیک یې پیل کړی، په ایکس کې لیکلي: "له نهه ګوندونو څخه ۲۲۱ پارلماني غړو ګډ لیک لاسلیک کړی چې له حکومت څخه یې غوښتنه کړې چې اوس د فلسطین د دولت په رسمیت پېژندنه وکړي."
د ساینس او ټکنالوژۍ وزیر پیټر کایل په احتیاط سره ځواب ورکړ، ویې ویل چې بریتانیا لا هم د فلسطین د دولت د رسمیت پېژندنې ملاتړ کوي، خو اوسني لومړیتوبونه بشري دي: "موږ د فلسطین د دولت غوښتونکي یو، موږ یې هیله لرو... خو اوس، نن، موږ باید دې ته پام وکړو چې څه به د کړاوونو کمولو کې مرسته وکړي."