Marwada Koowaad ee Turkiga, Emine Erdoğan, ayaa la kulantay Najat Maalla M’jid, oo ah ergeyga gaarka ah ee Qaramada Midoobay u qaabilsan xadgudubyada ka dhanka ah carruurta, Babatunde Ahonsi, Isuduwaha QM ee Turkiga, iyo Paolo Marchi, oo ah wakiilka UNICEF ee Turkiga.
Intii lagu guda jiray kulanka Khamiistii ka socday Qasriga Madaxtooyada ee Ankara, waxaa la iftiimiyay "Mashruuca Danjireyaasha Iskaa Wax U Qabso" ee Madaxweyne Erdoğan, oo la bilaabay 2012 si carruurta loogu meeleeyo deegaanno qoys.
Mashruucan ayaa loo soo bandhigay sidii tusaale caalami ah.
Paolo Marchi wuxuu xusay in Emine Erdoğan ay ku leedahay doorkeeda hoggaamineed ee arrimaha carruurta, gudaha iyo dibadda Turkiga.
'In loo noqdo codka carruurta'
Intii uu kulanku socday, waxaa la dhaafsaday aragtiyo ku saabsan hawlo kala duwan, waxaana laga wada hadlay fursadaha iskaashi.
Wasiirka Qoyska iyo Adeegyada Bulshada ee Turkiga Mahinur Özdemir Göktaş ayaa sidoo kale ka qayb gashay kulanka.
Kulanka kadib, Erdoğan waxay ku qortay barta X:
"Waxaan ka wada hadalnay xoojinta iskaashiga caalamiga ah si looga hortago dhammaan noocyada rabshadaha ka dhanka ah carruurta iyo in la sii xoojiyo hababka ilaalintooda."
Waxay sheegtay inay sidoo kale ka wadahadleen dhinacyada ay iska kaashanayaan, gaar ahaan faafinta nidaamka daryeelka kumeelgaarka ah iyadoo la adeegsanayo Mashruuca Danjireyaasha Iskaa Wax U Qabso.
Erdoğan waxay muujisay isku raacsanaanta ku aaddan dhisidda nidaam dowladeed oo dal walba ka jiro, kaas oo hubinaya badbaadada carruurta ee xagga caafimaadka iyo ammaanka, isla markaana siinaya deegaan qoys oo ay ku barbaaraan.
"Waxaan sidoo kale isweydaarsanay fikrado ku saabsan masiibada ka jirta Qaza iyo tallaabooyin la taaban karo ee la qaadi karo si loo ilaaliyo carruurta. In la noqdo codka carruurta lana hubiyo inay gaaraan mustaqbal nabdoon oo rajo leh waa waajib na wada saaran."
Waxay hadalkeeda ku soo gabagabaysay:"Waxaan u arkaa iskaashi kasta oo arrintan ku saabsan mid aad u qiimo badan, waxaana rajaynayaa in midnimadeennu ay sii korodho."
