Saddex muwaadin oo Hindi ah ayaa lagu xiray Ghana iyadoo looga shakisan yahay in ay maamulayeen shabakad dahab kontarabaan ah oo ay mas'uuliyiintu aaminsan yihiin inay dalka ka saarayeen tanan oo ah birta qaaliga ah muddo ka badan toban sano, sida uu sheegay maamulka ganacsiga dahabka ee dalka Galbeedka Afrika ku yaal Talaadadii.
Saddexduba waxay qirteen dembiga markii maxkamadda la hor keenay waxayna ku sii jiri doonaan xabsiga ilaa dhageysi maxkamadeed oo loo qorsheeyay 12-ka May, sida uu sheegay afhayeen u hadlay maamulka GoldBod.
Ghana iyo qaar ka mid ah dalalka kale ee Afrika ah ayaa sannad kasta lumiyaan dahab qiimihiisu balaayiin doolar yahay sababo la xiriira kontarabaanka.
Dalkaasi ayaa bishii Maarso aasaasay hay'ad dawladeed cusub oo dawli ah oo loo yaqaan GoldBod si loo habeeyo iibsashada dahabka ee macdan qodayaasha yar-yar, loo kordhiyo dakhligooda loona yareeyo saameynta kontarabaanka.
Nidaamkan cusub hoostiisa, shirkadaha ajnabiga ahi waxay birta qaaliga ah ka heli karaan oo keliya GoldBod.
'Inta badan dahabka la kontarabaaniyo waxaa loo dhoofiyaa Hindiya, Shiinaha, Imaaraadka Carabta'
Maamulku ayaa barta X ku sheegay in eedeysanayaasha – oo da'doodu tahay 35, 22 iyo 42 jir – lagu qabtay hoygooda oo ku yaalla magaalada Kumasi ee koonfurta Ghana, kaasoo baarayaashu sheegeen in loo beddelay xarun ganacsi dahab oo aan sharciyeysnayn.
GoldBod ayaa sidoo kale sheegtay in laga helay 1.9 milyan oo Cedi ($134,000), 4,500 oo Rubee ($53), 4.363 kiiloogaraam oo dahab ah, laba mashiin oo lacagta lagu tiriyo, qalab duuba CCTV iyo baasaboor Hindi ah.
Maamulku ayaa sido kale sheegay in eedeysanayaashu aysan u soo gudbin GoldBod shatiyada deganaanshaha, oggolaanshaha shaqada ama diiwaannada bixinta canshuurta ee la xiriira hawlahooda ganacsi.
"Inta badan dahabka la kontarabaaniyo waxaa loo dhoofiyaa Hindiya, Shiinaha iyo Isutagga Imaaraadka Carabta annaguna waan khasaarnaa,' ayuu afhayeenka GoldBod Prince Kwame Minkah u sheegay Reuters."
