Koonfurta Suudaan ayaa wafdi u diri doonta Mareykanka si loo fududeeyo dib u soo celinta ku dhawaad 137 muwaadin oo u dhashay Koonfurta Suudaan, sida lagu sheegay xafiiska Madaxweyne Ku-xigeenka Benjamin Bol Mel.
"Dawladda Jamhuuriyadda Koonfurta Suudaan waxay qaadaysaa mas’uuliyadda buuxda oo ah inay arrintan wax uga qabato si dhab ah oo degdeg ah, uga shaqeynaysa sidii loo xallin lahaa,” sida ay u qalanto," ayaa lagu yiri bayaan uu xafiiska Bol Mel Axaddii ku baahiyay barta X (Twitter).
Wafdi heer sare ah, oo ay hoggaaminayaan Wasiirka Maaliyadda Marial Dongrin Ater, Guddoomiyaha Bangiga Dhexe Johnny Ohisa Damian, iyo Agaasimaha Diiwaangelinta Madaniga Elia Kosta Faustino, ayaa si dhow ula shaqeyn doona Waaxda Arrimaha Dibadda ee Mareykanka iyo Waaxda Amniga Gudaha, si loo hubiyo in habka soo celinta uu noqdo mid “nidaamsan, sharci ah, oo sharaf leh.”
Arrintan waxay timid ka dib markii Makula Kintu, oo la sheegay inuu yahay qof laga soo tarxiilay Congo oo isku sheegay Nemeri Garang, markii hore laga hor istaagay inuu galo Garoonka Caalamiga ah ee Juba ka dib markii laga soo tarxiilay Mareykanka, taasoo keentay khilaaf fiiseed oo dhex maray Washington iyo Juba.
Koonfurta Suudaan ayaa markii dambe u oggolaatay Kintu inuu dalka soo galo, iyadoo ay jiraan “xiriir saaxiibtinimo oo hore u jiray” ee labada dal.
Bayaanka ayaa dhacdadan ku tilmaamay "mid laga xumaado oo gooni ah", waxaana lagu sheegay in tallaabooyin gudaha ah la qaaday tan iyo markaas si looga hortago soo noqnoqoshada dhacdooyinkaas noocaas ah.
"Waan ka raalligelineynaa dhib kasta oo soo gaaray Dowladda Mareykanka, waxaana ku celinaynaa rabitaankeenna ah inaan si degdeg ah oo iskaashi ku dhisan ku xallinno arrintan," ayaa lagu daray bayaanka.
Isagoo muujinaya sida Madaxweyne Salva Kiir Mayardit uga go’an tahay ilaalinta xiriirka laba geesood ah oo "diirran, wax dhisaya, oo wanaagsan" oo lala yeesho Washington, kaasoo daboolaya dhammaan danaha guud, bayaanka ayaa lagu yiri:
"Koonfurta Suudaan waxay ku faanaysaa inay Mareykanka la garab taagan tahay sidii shuraako loogu ahaan lahaa sugidda helitaanka kheyraadka istaraatiijiga ah ee muhiimka u ah dhaqaalaha iyo amniga qaranka ee Koonfurta Suudaan iyo Mareykanka labadaba."
