6 hours ago
ئىسرائىلىيە 13-ئىيۇندىن باشلاپ، ئىرانغا كەڭ كۆلەملىك ھۇجۇم باشلاپ، بىر قىسىم مۇھىم يادرو ئەسلىھەلىرىنى ئۆز ئىچىگە ئالغان ئورۇنلارغا زەربە بەردى. ھازىرغىچە بۇ قېتىملىق ھۇجۇملاردا 104 تىن ئارتۇق ئادەم جېنىدىن ئايرىلدى، 380 گە يېقىن ئادەم يارىلاندى.
رويتېرس ئاگېنتلىقىنىڭ خەۋىرىگە قارىغاندا، ئىسرائىلىيەنىڭ ھۇجۇمىدا كەم دېگەندە 14 ئىران يادرو ئالىمى ۋە بىر قانچە ھەربىي ئەمەلدار جېنىدىن ئايرىلغان.
ئىسرائىلىيە ئارمىيەسى ئىراننىڭ توققۇز يادرو ئالىمىنى ئۆلتۈرگەنلىكىنى جاكارلىدى. ئىسرائىلىيە ئارمىيەسى X (ئىلگىرىكى تۋىتتېر) دا ھەمبەھرلىگەن باياناتىدا: «ئىران ھاكىمىيىتىنىڭ يادرو قوراللىرى پىلانىنى تەرەققىي قىلدۇرۇشقا مەسئۇل توققۇز پېشقەدەم ئالىم ۋە مۇتەخەسسىس ئۆلتۈرۈلدى» دېدى.
ئىسرائىلىيە ئارمىيەسىنىڭ باياناتىغا قارىغاندا، جېنىدىن ئايرىلغان ئالىم ۋە مۇتەخەسسىسلەرنىڭ ھەممىسى ئىراننىڭ يادرو قوراللىرىنى تەرەققىي قىلدۇرۇشتا ھەل قىلغۇچ رول ئوينىغان.
ئىسىرائىلىيە ئارمىيەسىنىڭ باياناتىدا مۇنداق دېيىلدى: «ئۇلارنىڭ ئۆلتۈرۈلۈشى ھاكىمىيەتنىڭ كەڭ كۆلەملىك قىرغۇچى قوراللارغا ئېرىشىش ئىقتىدارىغا زور زەربە بېرىدۇ.»
مۇناسىۋەتلىك ئۇچۇرلارTRT Global - Won't kill Iran's supreme leader — at least 'for now': Trump
ئۇنداقتا ھازىرغىچە ئۆلتۈرۈلگەن يۇقىرى دەرىجىلىك ھەربىي ئەمەلدارلار ۋە ئالىملار كىملەر؟
ھەربىي ئەمەلدارلار
ئۆلتۈرۈلگەنلىكى جەزملەشتۈرۈلگەن 16 كىشى، ئىسرائىلىيە ھۇجۇمىغا ئۇچرىغان ئىسلام ئىنقىلابى قوغدىنىش قىسمى (IRGC) نىڭ 20 دىن ئارتۇق يۇقىرى دەرىجىلىك ئەمەلدارى ۋە باشقا يۇقىرى دەرىجىلىك قوماندانلارنىڭ ئىچىدە.
گېنېرال مايور مۇھەممەد باغىرى ئىران قوراللىق قىسىملىرىنىڭ ئىشتاب باشلىقى بولغان. ئۇ ئىراندىكى ئەڭ پېشقەدەم ھەربىي ئەمەلدار بولۇپ ، ئالىي رەھبەر ئايەتۇللاھ ئەلى ھامېنىدىن قالسىلا ئىككىنچى ئورۇندا تۇراتتى. ئۇ ئىران تېلېۋىزىيەسىنىڭ خەۋىرىگە قارىغاندا ، ئۇ ئىسلام ئىنقىلابى قوغدىنىش قىسمىغا قاتناشقان، ئىران-ئىراق ئۇرۇشى مەزگىلىدە ئىسلام ئىنقىلابى قوغدىنىش قىسمىدا ئاكتىپ خىزمەت قىلغان.
2002-يىلدىن 2014-يىلغىچە بولغان ئارىلىقتا ، ئۇ قوراللىق قىسىم باش ئىشتابىدا ئاخبارات ئىشلىرىغا مەسئۇل مۇئاۋىن باشلىق بولغان. ئۇ 2016-يىلى ئىراننىڭ ئالىي رەھبىرى ئايەتۇللاھ ئەلى ھامېنى تەرىپىدىن ئىران قوراللىق قىسىملىرىنىڭ ئىشتاب باشلىقى ۋەزىپىسىگە تەيىنلەنگەن.
ھۈسەيىن سالامى ئىسلام ئىنقىلابى قوغدىنىش قىسمىنىڭ باش قوماندانى ئىدى. ئىران تاراتقۇلىرىنىڭ خەۋىرىگە قارىغاندا، ئۇ 1980-يىلى ئىران-ئىراق ئۇرۇشى مەزگىلىدە ئىسلام ئىنقىلابى قوغدىنىش قىسمىغا قاتناشقان ، 1997-يىلدىن 2006-يىلغىچە ئىسلام ئىنقىلابى قوغدىنىش قىسمى بىرلەشمە خىزمەت گۇرۇپپىسىنىڭ مۇئاۋىن قوماندانى بولۇپ ۋەزىپە ئۆتىگەن. ئۇ 2019 -يىلى 4-ئايدا ئىسلام ئىنقىلابى قوغدىنىش قىسمىنىڭ قوماندانى بولغان.
غولام ئەلى رەشىد ئىراننىڭ خەتەم ئەل ئەنبىيا مەركىزىي قوماندانلىق ئىشتابىنىڭ قوماندانى ئىدى. يەرلىك تاراتقۇلارنىڭ خەۋىرىگە قارىغاندا، ئۇ ئىران-ئىراق ئۇرۇشىدا ئاساسلىق ھەربىي ئوفىتسېرلارنىڭ بىرى سۈپىتىدە ئوتتۇرىغا چىققان. ئۇ ئەينى ۋاقىتتا قوراللىق قىسىملارنىڭ قوماندانلىق ئىشتابىدا مۇھىم رول ئوينىغان.
ئامىر ئەلى ھاجىزادە ئىسلام ئىنقىلابى قوغدىنىش قىسمى ئالەم قاتنىشى ئەترىتىنىڭ قوماندانى بولغان. ئۇ ئىراننىڭ باشقۇرۇلىدىغان بومبا ئىنقىلابىدا مۇھىم رول ئوينىدى. ئۇ ئىران-ئىراق ئۇرۇشىدىن كېيىن ئىسلام ئىنقىلابى قوغدىنىش قىسمىنىڭ ئالەم قاتنىشى ئەترىتىگە قاتناشقان.
ئىران ئاخبارات تېلېۋىزىيەسى، «ھاجىزادە ئىراننىڭ باشقۇرۇلىدىغان بومبا ئىقتىدارىنى ئىلگىرى سۈرۈش ۋە دۆلەتنىڭ مۇداپىئە كۈچىنى كۈچەيتىشتە ئاساسلىق رول ئوينىدى» دەپ خەۋەر قىلدى.
مۇھەممەد كازىمى ئىسلام ئىنقىلابى قوغدىنىش قىسمىنىڭ ئاخبارات ئىشلىرىغا مەسئۇل قوماندان بولغان.
ئىسرائىلىيەنىڭ ھۇجۇملىرىدا ئۆلتۈرۈلگەن باشقا ھەربىي ئوفېتسىرلار: موخسېن باغىرى ، داۋۇت شېخيەن، مۇھەممەد باغىر تاھىرپور، مەنسۇر سافارپور، مەسئۇت تاييىب ، ھۆسرو ھەسەنى، مۇھەممەد جافارى ۋە جەۋاد جارسارا.
مۇناسىۋەتلىك ئۇچۇرلارTRT Global - US sending additional fighter jets to Middle East: report
