ئەلئەققاد ئاۋستىرالىيەنىڭ مېلبورندىكى ۋاقىتلىق ئۆيىدە: «مېنىڭچە ئىرقىي قىرغىنچىلىقنىڭ ئاخىرلاشقانلىقىنى ئىپادىلەيدىغان سۆز يوق. بىردىنبىر ئۈمىدىم، پەلەستىن ۋە پەلەستىنلىكلەر ئۈچۈن تېخىمۇ گۈزەل كېلەچەك. چۈنكى بىز بۇنىڭغا لايىقمىز. بۇنچىۋالا كۆپ ئادەمنىڭ ئۆلۈشىنىڭ توختىغانلىقىدىن مىننەتدارمەن. بىراق، بۇنچىۋالا ئېغىر ئىرقىي قىرغىنچىلىققا رۇخسەت قىلغان دۇنيادا <نېمە ئۈچۈن ياشايمىز؟> دەپ سوئال سورىماي تۇرالمايمەن.»

گەرچە ئۇ ۋەتىنىدىن يىراق بولسىمۇ، ئاۋازى دۇنيانىڭ ھەرقايسى جايلىرىدا ياڭرىدى. 2024-يىلدىكى تەسىرى ئەڭ كۈچلۈك 100 ئايالنىڭ بىرى بولغان ئالاقادنىڭ غەززەدىكى ھېكايىلەرنىڭ ئۇنتۇلماسلىقىغا كاپالەتلىك قىلىش ئىرادىسى قەتئىي. ئۇ غەززەدىكى ئەڭ ياش ژۇرنالىستلارنىڭ بىرى، ئىرقىي قىرغىنچىلىقنىڭ گۇۋاھچىسى ۋە خەلقىنىڭ ھېكايىلىرىنى سۆزلەشكە ئۆزىنى بېغىشلىغان مۇخبىر.

23 ياشلىق ئەلئەققاد ئۆزىنىڭ ئىسرائىلىيەگە قارشى سۆز قىلىش قورقۇنچىنى  يېڭىش ئارقىلىق ئىسرائىلىيەنىڭ تەنقىدلەرنى نەزەرگە ئالماسلىق تەشۋىقات ئىستراتېگىيەسىگە قارشى كۈرەش قىلىدۇ. ئۇ ئۆزىنىڭ ئىجتىمائىي تاراتقۇدىكى يازمىلىرى ئارقىلىق ئىسرائىلىيە ئىشغالىيىتى ئاستىدا ياشاشنىڭ جاپالىق رېئاللىقىنى ئاشكارىلاپ، پەلەستىنلىكلەرنىڭ قەيسەرلىكى ۋە ئادىمىيلىكىنى ماختايدۇ.

«بىز پەقەت سان ئەمەس»

ئەلئەققاد ت ر ت ۋورلد (TRT World) نىڭ زىيارىتىنى قوبۇل قىلغاندا مۇنداق دەيدۇ:

«غەززەدە بىز ئۆزىمىزنى پەقەت سان دەپ قارىمايمىز. بىز بىر-بىرىمىزنى ئىسمىمىز ۋە ھېكايىلىرىمىز، ئىجتىمائىي توپلۇق بولۇش سۈپىتىدە چوڭقۇر رىشتىلىرىمىز ئارقىلىق تونۇيمىز.»

ئەلئەققادنىڭ ۋەتىنى بىلەن كۈچلۈك رىشتىسى بار. ئۇ 2023-يىلى ئۆكتەبىردە يۈز بەرگەن دەھشەتلىك ھۇجۇمدىن ئىلگىرى تۆت قېتىملىق ھەربىي ھەرىكەتكە شاھىت بولغان. گەرچە قىيىنچىلىق بولسىمۇ، ھېكايە سۆزلەش غەززەنى تۇتقان ئىجتىمائىي قۇرۇلمىنى ساقلاپ قالىدۇ.

ئۇ: «مەن غەززەنىڭ كىچىكلىكىنى  ناھايىتى ياخشى كۆرىمەن، ھەممە ئادەم دېگۈدەك بىر-بىرىنى تونۇيدۇ. ئۇ يەردە ماگېزىندا ئىشلەيدىغان كىشى ماگېزىن خىزمەتچىسىلا ئەمەس. ئوقۇتقۇچى پەقەت ئوقۇتقۇچىلا ئەمەس. ئۇلار ھاياتىمىزنىڭ بىر پارچىسى» دەيدۇ.

ئەلئەققادنىڭ ھېكايە سۆزلەشكە بولغان ئىشتىياقى كىچىكىدىن باشلانغان. ئالتىنچى سىنىپتا ژۇرنالىست بولغان ئەرەب تىلى ئوقۇتقۇچىسى راۋاندىن ئىلھام ئالغان. ئۇ يەتتىنچى سىنىپتا خاتىرىسىنى ئەرەبچە ۋە ئىنگلىزچە ماقالىلەر، شېئىرلار بىلەن تولدۇراتتى.

ئۇ شىمالىي قىبرىس تۈرك جۇمھۇرىيىتى شەرقىي ئاقدېڭىز ئۇنىۋېرسىتېتىنىڭ يېڭى مېدىيا ۋە ژۇرنالىستلىق كەسپىنى پۈتتۈرگەندىن كېيىن، 21 يېشىدا غەززەگە قايتىپ كېلىدۇ. ئۇنىڭ مەقسىتى قېلىپلىشىپ قالغان ۋەزىيەتكە جەڭ ئېلان قىلىش ۋە ۋەتىنىنىڭ ھەقىقىي ھېكايىلىرىنى سۆزلەش ئىدى. ئۇ غەززەنىڭ نوقۇل خارابىلىق ئوبرازىغا ئايلىنىپ قېلىشىنى خالىمايتتى. ئۇ جەمئىيەتنىڭ ھەقىقىي ماھىيىتىنى كۆرسىتىشنى خالايتتى.

ئۇ بۇ ھەقتە مۇنداق دەيدۇ:

«مەن كىشىلەرنىڭ يۇرتۇمنى مېنىڭ كۆزۈم بىلەن كۆرۈشى ئۈچۈن غەززەگە قايتىشنى قارار قىلدىم.»

بەختكە قارشى ئەلئەققادنىڭ دۆلىتىگە قايتىپ كېلىشى، ئىسرائىلىيەنىڭ غەززەگە قاراتقان ئىرقىي قىرغىنچىلىقىغا توغرا كەلدى. غەززە سەھىيە مىنىستىرلىقىنىڭ سانلىق مەلۇماتلىرىغا قارىغاندا، 2023-يىلى 7-ئۆكتەبىردىن باشلاپ، ئىسرائىلىيەنىڭ ھۇجۇملىرىدا ئاز دېگەندە 48 مىڭ 200 پەلەستىنلىك ئۆلگەن، كەم دېگەندە 111 مىڭ 660 ئادەم يارىلانغان. ئالاقاد بۇلارنىڭ ھەممىسىگە گۇۋاھ بولدى.

ئۇ: «7-ئۆكتەبىردىن ئۈچ كۈن كېيىن، بومباردىمانلار شۇنداق دەھشەتلىك بولدىكى، مەن تۇرغان بىناغا بىر قاتار ھۇجۇملار بولدى. مەن بىر ۋىدېيو تارتتىم، ئۇ كۆپ تارقالدى. شۇندىن بېرى غەززەدە يۈز بەرگەن ۋەقەلەرنى دۇنياغا كۆرسىتىشنى ئۇنتۇپ قالمىدىم» دەيدۇ.

ئەلئەققادنىڭ ئىسرائىلىيە قورشاۋىدىكى ھاياتلىق ۋە باشقا كىشىلەرنىڭ ھېكايىلىرى دۇنيانىڭ ھەرقايسى جايلىرىدا ئەكس سادا پەيدا قىلدى. ئىنستاگرامدا ئەگەشكۈچىلىرىنىڭ سانى 3 مىڭدىن 4 مىليونغا چىقتى. ئۇ تىرىشچانلىقلىرى نەتىجىسىدە 2024-يىلدىكى تەسىرى ئەڭ كۈچلۈك 100 ئايالنىڭ قاتارىدىن ئورۇن ئالدى. ئالاقاد ئەسەرلىرىنى تۆۋەندىكى ئىپادىلەر بىلەن شەرھىلەيدۇ: «دۇنيانىڭ ئىسمىمىزنى ۋە ھېكايىلىرىمىزنى بىلىشىنى ئۈمىد قىلىمەن.»

ئەلئەققاد تۇنجى ئۇرۇش توختىتىش مەزگىلىدە ئانىسى، سىڭلىسى ۋە مومىسى بىلەن رەفاھ چېگرا ئېغىزىدىن مىسىرغا ئۆتىدۇ. ئۇلار كېيىنچە تاغىسىنىڭ دۆلەت تەۋەلىكى سەۋەبىدىن ئاۋستىرالىيەگە كۆچۈپ بارىدۇ.

ئۇ: «مەن ئىككى ياكى ئۈچ ھەپتە ئىچىدە قايتىپ كېتىمەن دەپ ئويلىغان ئىدىم. بىز ھۇجۇمنىڭ بۇنداق ئۇزۇن داۋاملىشىدىغانلىقىنى ئويلىمىغانىدۇق. ھازىر قاچان قايتارمەن دەپ ئويلايمەن» دەيدۇ.

«غەززەنىڭ كۆزى»

ئۇ 2022-يىلى ئىسرائىلىيە ئارمىيەسى تەرىپىدىن ئۆلتۈرۈلگەن ئەسلى پەلەستىنلىك ئامېرىكا پۇقراسى ژۇرنالىست شىرىن ئەبۇ ئاكىلەنىڭ شەرىپىگە بېرىلگەن «شىرىن ئەبۇ ئاكىلە ئوقۇش مۇكاپاتى» غا ئېرىشىدۇ. بۇ ئوقۇش مۇكاپاتى ئۇنى 2024-يىلى 8-ئايدا باشلىغان ئامېرىكا بېيرۇت ئۇنىۋېرسىتېتىدا ئاخبارات كەسپىدە ماگىستېرلىقتا ئوقۇشىنى كاپالەتكە ئىگە قىلىدۇ.

ئەلئەققاد غەززەدىكى ئىرقىي قىرغىنچىلىقنى ھۆججەتلەشتۈرگەندىن كېيىن، پەلەستىننىڭ ھەق-ھوقۇقىنى قوغداشنىڭ يېڭى يوللىرىنى تاپىدۇ. ئۇنىڭ كەچۈرمىشلىرى 17-ئاپرېل پەن ماكمىللان (Pan Macmillan) تەرىپىدىن نەشر قىلىنىدىغان «غەززەنىڭ كۆزى» ناملىق كىتابىنىڭ ئاساسىنى تەشكىل قىلىدۇ.

ئەلئەققاد بۇ كىتاب ھەققىدە مۇنداق دەيدۇ:

«بۇ كىتاب مېنىڭ كۆزۈم ئارقىلىق غەززەنى كۆرسىتىشىمگە ۋە پەلەستىن خەلقىنىڭ ھېكايىلىرىنى سۆزلىشىمگە ئىمكانىيەت يارىتىپ بەردى.»

ئەلئەققاد بۇ كىتابىنى 2023-يىلى 7-ئۆكتەبىر ئىسرائىلىيە ھۇجۇمى باشلانغاندىن كېيىن يېزىشقا باشلىغان. ئۇ كىتابىدا ئىسرائىلىيەنىڭ بومباردىمانلىرى ئاستىدا كۆرگەن قىرغىنچىلىقلارنى ئىخچام شەكىلدە تەسۋىرلەيدۇ.