پەلەستىننىڭ بىرلەشكەن دۆلەتلەر تەشكىلاتى (ب د ت) دا تۇرۇشلۇق دائىملىق ۋەكىلى رىياد مەنسۇر قورشاۋغا ئېلىنغان رايونغا ياردەم يەتكۈزۈلۈشىگە يول قويۇلۇۋاتقاندەك تەسىر پەيدا قىلىشقا ئۇرۇنۇۋاتقان ئىسرائىلىيەنىڭ، غەززەنى ھاياتلىقنىڭ داۋاملىشىشى مۇمكىن بولمايدىغان ھالەتكە ئايلاندۇرۇشنى داۋاملاشتۇرۇش بىلەن ئەيىبلىدى.

پەلەستىننىڭ ب د ت دىكى دائىمىي ۋەكىلى رىياد مەنسۇر خەۋپسىزلىك كېڭىشىدىكى سۆزى جەريانىدا كۆز ياشلىرىنى تۇتۇۋالالمىدى؛ ئۇ خەۋپسىزلىك كېڭىشىنى غەززەدە قورشاۋ ئاستىدا قالغان پەلەستىنلىك بالىلارغا قارىتىلغان «ئىرقىي قىرغىنچىلىق»نى توختىتىشقا چاقىردى.

ئۇ چارشەنبە كۈنى خەۋپسىزلىك كېڭىشىدە سۆز قىلىپ، پەلەستىنلىكلەرنىڭ «ئۇزۇندىن بۇيان سۇ، يېمەك-ئىچمەك ۋە دورا-دەرمەكتىن مەھرۇم قالدۇرۇلغانلىقىنى ۋە ھايات قېلىش ئۈچۈن تىرمىشىۋاتقانلىقىنى» بىلدۈردى ۋە خەۋپسىزلىك كېڭىشىنى ھەرىكەتكە ئۆتمەسلىك بىلەن ئەيىبلىدى.

ئۇ: «بۇ ئىشەنگۈسىز ئەھۋال.  سىلەر يەنە قانچىلىك ساقلايسىلەر؟» دېدى.

مەنسۇر ئىسرائىلىيەنى، رايونغا ياردەم يەتكۈزۈۋاتقاندەك تەسىر پەيدا قىلىشقا ئۇرۇنۇش بىلەن بىرگە، «غەززەدە ھاياتلىقنىڭ داۋاملىشىشىغا توسقۇنلۇق قىلىش بىلەن» ئەيىبلىدى.

ئۇ سۆزىنى داۋاملاشتۇرۇپ: «ئەگەر ئىسرائىلىيە ياردەملەرنىڭ يېتىپ بېرىشىنى ئارزۇ قىلسا، چېگرا ئېغىزلىرىنى ئاچاتتى ۋە ب د ت بىلەن، بولۇپمۇ ب د ت نىڭ پەلەستىنلىك مۇساپىرلارغا ياردەم بېرىدىغان ب د ت ئورگىنىنى ئۆز ئىچىگە ئالغان تەرەپلەرنىڭ ئىنسانپەرۋەرلىك ياردەملىرىنىڭ رايونغا تولۇق ۋە دەرھال كىرىشىگە رۇخسەت قىلغان بولاتتى» دېدى.

ئىسرائىلىيەنىڭ پەلەستىنلىكلەرنى يۇرت-ماكانلىرىدىن كۆچۈرۈۋېتىشنى مەقسەت قىلىدىغانلىقىنى ئىلگىرى سۈرگەن مەنسۇر: «ئاساسلىق مەسىلە، پەلەستىنلىكلەردىن قۇتۇلۇش؛ ئۇلارنى ئۆلتۈرۈش، ئاچ قويۇش ۋە باشقىلارنى يوقىتىش، ياشاشنى تاللىماقچى بولغانلارغا باشقا ئامال قالدۇرماسلىقتۇر» دېگەنلەرنى قەيت قىلدى.

ئۇ سۆزى جەريانىدا يەنە، ۋەزىپە ئۆتەۋاتقاندا توققۇز بالىسىدىن ئايرىلىپ قالغان دوكتور ئالا ئەننەججارنىڭ پاجىئەلىك ھېكايىسىنى سۆزلەپ بېرىپ: «ئەگەر بۇ ئىرقىي قىرغىنچىلىقنى، ئۇمۇ (يەنى دوكتور نەججارمۇ) ئۆلتۈرۈلۈشتىن ئىلگىرى توختىتالىساق ياخشى بولىدۇ؛ ھايات قۇتقۇزۇش ئۈچۈن تىرىشىۋاتقان بىر دوختۇر بولۇش سۈپىتى بىلەن، شەرەپلىك ۋەزىپىسىنى ئۆتەۋاتقان دوكتور نەججار، بالىلىرى دوختۇرخانىغا ئېلىپ كېلىنگەندە ئۇلارنىڭ كۆيۈپ جان ئۈزگەن ھالىتىنى كۆردى» دېدى.

«10بالىسىدىن 9 ىنى يوقاتتى، بۇ ئەقىلگە سىغمايدىغان، يۈرەك بەرداشلىق بېرەلمەيدىغان بىر ئازاب ۋە روھىي زەربىدۇر» دېگەنلەرنى سۆزلىرىگە ئىلاۋە قىلدى.

ئۇ خەۋپسىزلىك كېڭىشىدىكى ئىنتايىن ھېسىياتلىق سۆزلىرىنىڭ ئاخىرىدا خەۋپسىزلى كېڭىشىگە يالۋۇرغان ھالدا: «بىر ئىش قىلىڭلار. پەلەستىن خەلقىگە قارشى سادىر قىلىنىۋاتقان بۇ جىنايەتكە، بۇ قىرغىنچىلىقنى توختىتىڭلار» دېدى.