ئامېرىكا قوشما ئىشتاتلىرى ھىندىستاننىڭ پۇل - مۇئامىلە مەركىزى بومباي شەھىرىدە 2008-يىلى يۈز بەرگەن ۋە 160 تىن ئارتۇق كىشىنىڭ جېنىغا زامىن بولغان تېررورلۇق ھۇجۇملىرى بىلەن چېتىشلىقى بار بىر گۇماندارنىڭ ھىندىستانغا قايتۇرۇپ بېرىلىشىنى تەستىقلىدى. پىرېزىدېنت دونالد ترامپ پەيشەنبە كۈنى ھىندىستان باش مىنىستىرى نارېندرا مودى بىلەن ئۆتكۈزگەن قوشما ئاخبارات ئېلان قىلىش يىغىنىدا، بۇ ھەقتە مەلۇمات بەردى.166 كىشى ھاياتىدىن ئايرىلغان، مېھمانخانىلار، بىر پويىز ئىستانسىسى ۋە بىر يەھۇدىي سودا مەركىزى نىشان قىلىنغان ھەمدە ئۇدا ئۈچ كۈن داۋاملاشقان ھۇجۇملار 2008-يىلى 26-نويابىر كۈنى باشلانغانىدى.ترامپ ئاقسارايدا مۇخبىرلارنى كۈتۈۋېلىش يىغىنىدا بۇ ھەقتە قىلغان سۆزىدە مۇنداق دېدى:«ھۆكۈمىتىم 2008-يىلى ھىندىستاننىڭ بومباي شەھىرىدە يۈز بەرگەن تېررورلۇق ھۇجۇمى بىلەن چېتىشلىقى بار، دۇنيا بويىچە ئەڭ ناچار ئادەملەردىن بىرى بولغان بىر سۇيقەستچىنىڭ ھىندىستاندا ئادالەت بىلەن يۈزلىشىشى ئۈچۈن ھىندىستانغا قايتۇرۇپ بېرىلىشىنى تەستىقلىدى، بۇنىڭدىن ئىنتايىن خۇرسەنمەن. دەرۋەقە، بۇ كىشى ئادالەت بىلەن يۈزلىشىش ئۈچۈن ھىندىستانغا قايتماقتا.»ترامپ ئاخبارات ئېلان قىلىش يىغىنىدا مەزكۇر كىشىنىڭ ئىسمىنى ئاشكارىلىمىدى. ئەمما ترامپ بىلەن مودىنىڭ كېيىنچە ئېلان قىلغان بىرلەشمە باياناتىدا، بۇ كىشىنىڭ چىكاگولۇق سودىگەر ۋە كانادا پۇقراسى تاخاۋۋۇر رانا ئىكەنلىكى بىلدۈرۈلدى.ئالدىنقى ئاينىڭ ئاخىرىلىرى ئامېرىكا قوشما ئىشتاتلىرى ئالىي سوت مەھكىمىسى رانانىڭ ئامېرىكانىڭ ئۇنى ھىندىستانغا قايتۇرۇپ بېرىشىگە ئېتىراز بىلدۈرۈپ سۇنغان ئىلتىماسىنى رەت قىلدى.ئىگىلىنىشىچە، رانا نۆۋەتتە ئامېرىكا قوشما ئىشتاتلىرىدىكى بىر تۈرمىدە تۇتۇلماقتا ئىكەن.
