تۈركىيە گېرمانىيەنىڭ سۇلىنگېن شەھىرىدە 1993-يىلى يۈز بەرگەن ئىرقچى ئوت قويۇپ بېرىش ھۇجۇمىدا ھاياتىدىن ئايرىلغان بەش تۈركىيە پۇقراسىنى خاتىرىلىدى.
تۈركىيە جۇمھۇرىيىتى تاشقى ئىشلار مىنىستىرلىقى چارشەنبە كۈنى بايانات ئېلان قىلىپ: «سۇلىنگېندا 32 يىل ئىلگىرى يۈز بەرگەن ئىرقچى ھۇجۇمدا ھاياتىدىن ئايرىلغان بەش پۇقرايىمىزنى ھۆرمەت بىلەن ئەسلەيمىز» دېگەن سۆزلەرنى ئىشلەتتى.
مىنىستىرلىق يەنە ھۇجۇمدا ئىككى قىزى، ئىككى نەۋرىسى ۋە بىر جىيەنىدىن ئايرىلغان، ئەمما كېيىن تىنچلىق ۋە مۇتەدىللىك چاقىرىقلىرى بىلەن گېرمانىيەدە يارىشىشنىڭ سىمۋولىغا ئايلانغان مەۋلۇدە گەنچكىمۇ ھۆرمەت بىلدۈردى. 2022-يىلى ۋاپات بولغان مەۋلۇدە گەنچ گېرمانىيەدە دائىم «دانىشمەن ئانا» دەپ ئاتىلاتتى.
تۈركىيە تاشقى ئىشلار مىنىستىرلىقى باياناتىدا: «بۇ مۇناسىۋەت بىلەن مەۋلۇدە گەنچنىڭ ئەزىز خاتىرىسىنى يەنە بىر قېتىم ھۆرمەت ۋە مىننەتدارلىق بىلەن ئەسلەيمىز» دېيىلدى.
The matriarch of a Turkish "guest worker" family Mevlude Genc working towards reconciliation between Germans and Turks has died. Her two daughters, two granddaughters and niece were killed in an arson attack by neo-Nazis in the 1990s.
ئىرقچىلىق ۋە ئىسلامئوفوبىيە (ئىسلامغا ئۆچمەنلىك قىلىش) گە قارشى كۈرەش
باياناتتا يەنە تۈركىيەنىڭ «كۈنسېرى كۈچىيىۋاتقان ئىرقچىلىق، چەت ئەللىكلەرگە ئۆچمەنلىك قىلىش ۋە ئىسلامغا دۈشمەنلىك قىلىشقا قارشى ھەر قايسى مۇنبەرلەردە كۈرەش قىلىشنى» داۋاملاشتۇرىدىغانلىقى تەكىتلەندى.
1993 – يىلى 29-مايدا يېشى 16 دىن 23 كىچە بولغان تۆت ئاشقۇن ئوڭچى گېرمانىيەلىك ياش، شىمالىي رېيىن-ۋېستفالىيە ئۆلكىسىگە قاراشلىق سۇلىنگېن شەھىرىدە ياشايدىغان تېگى تۈرك گەنچ ئائىلىسىنىڭ ئۆيىگە ئوت قويۈپ بەرگەن ئىدى. ھۇجۇمدا بەش كىشى ھاياتىدىن ئايرىلىپ، 14 كىشى يارىلانغان ئىدى.
ھۇجۇم قىلغۇچىلاردىن ئۈچ نەپىرى 10 يىللىق قاماق جازاسىغا، تۆتىنچىسى 15 يىللىق قاماق جازاسىغا ھۆكۈم قىلىندى.
بۇ ھۇجۇم گېرمانىيەنى قاتتىق زىلزىلىگە سالغان ۋە خەلقئارانىڭ ئەيىبلىشىگە ئۇچراپ، دۆلەتتە ئىرقچىلىق ۋە ئىنتېگىراتسىيە مەسىلىلىرى ھەققىدە مۇنازىرىلەرنى قوزغىغان ئىدى.
