Нетанјаху ја гледа војната со Иран како можност за враќање на заложниците, додека САД притискаат за прекин на огнот во Газа. Туркије како клучен фактор кон нов мировен пат, Канада го укинува дигиталниот данок за подобри трговски односи со САД, а во Бугарија илјадници протестираат против воведувањето на еврото.

Слушате Блиц вести на ТРТ Балкан на македонски, денеска е понеделник, 30 јуни

Нетанјаху: Војната со Иран создаде можност за враќање на заложниците од Газа

Израелскиот премиер Бенјамин Нетанјаху изјави дека 12-дневната војна со Иран создала можност за Израел, првенствено да ги врати заложниците заробени од палестинските милитанти во Газа по нападот на 7 октомври 2023 година. Неговата изјава, заедно со одлуката на Окружниот суд во Ерусалим да го одложи неговото сослушување во долготрајниот судски процес за корупција, покрена шпекулации дека може да се постигне напредок кон прекинување на конфликтот во Газа и обезбедување на ослободување на заложниците

САД планираат да извршат притисок врз израелски министер за ставање крај на војната во Газа

Израелскиот министер за стратешки прашања, Рон Дермер, кој денес престојува во Вашингтон, се очекува да се соочи со притисок од страна на американската страна за постигнување договор за прекин на огнот и размена на заробеници во Појасот Газа, пренесуваат израелските медиуми. Весникот „Тајмс оф Израел“ цитира извори според кои главна пречка во преговорите е барањето на палестинската група Хамас за траен прекин на војната, наспроти настојувањата на Израел за постигнување само привремен прекин на огнот што ќе му овозможи повторно продолжување на борбите.

Туркије е клучна за новиот пат кон мир на Блискиот Исток, изјави американскиот амбасадор Барак

Американскиот амбасадор во Туркије, Том Барак, ја нагласи клучната улога на Анкара во регионалната динамика, велејќи: „Израел треба да се редефинира, тој е во процес на редефинирање. А она што штотуку се случи меѓу Израел и Иран е можност за сите нас да кажеме, тајм аут, создадеме нов пат. Туркије е клучна за тој нов пат“. Во интервју за Анадолу, амбасадорот Барак, кој е и специјален претставник на Соединетите Американски Држави (САД) за Сирија, се осврна на своите длабоки лични врски со Туркије.

Канада го поништува данокот на дигитални услуги за да ги унапреди трговските преговори со САД

Канада во недела објави дека ќе го поништи данокот на дигитални услуги (ДСТ) и ќе ги продолжи преговорите со САД со цел постигнување трговски договор до 21 јули. „Денешното соопштение ќе поддржи продолжување на преговорите кон временската рамка од 21 јули 2025 година, утврдена на Самитот на лидерите на Г7 овој месец во Кананаскис“, изјави канадскиот премиер Марк Карни.

И за крај на денешниот блиц...

Илјадници луѓе протестираа во Софијa против воведувањето на еврото

Илјадници луѓе протестираа во саботата во Софија барајќи референдум и одложување на воведувањето на еврото. Бугарија треба да се приклучи на еврозоната на 1 јануари следната година, а водачите на протестите - националистички и проруски партии - тврдат дека земјата ќе го изгуби својот монетарен суверенитет како резултат на тоа. Тие започнаа процес на импичмент на владата во парламентот, додека конечното зелено светло за приклучување кон еврозоната се очекува од Европскиот парламент и Советот на министри за финансии.

Тоа е сѐ за денешните блиц вести. За повеќе посетете нѐ на macedonian.trtbalkan.com