САД досега собрале 100 милијарди долари од царини, а Трамп се закани со 50% тарифа за увоз на бакар; во Газа почина уште едно бебе поради неухранетост и дехидрација; ФБИ отвори истрага против поранешни шефови на ЦИА и ФБИ; израелски доселеници нападнаа палестински град на Западниот Брег и повредија неколкумина; во Франција, пожарот кај Марсеј сè уште не е изгаснат, со 110 повредени лица.

Слушате Блиц вести на ТРТ Балкан на македонски, денеска е среда, 9 јули

САД заработиле 100 милијарди долари од тарифите, Трамп се закани и со 50% царини за увоз на бакар

Американскиот министер за финансии Скот Бесент изјави во вторникот дека САД собрале околу 100 милијарди долари царински приходи досега годинава, а таа сума би можела да се зголеми на 300 милијарди долари до крајот на 2025 година, бидејќи наплатите се забрзуваат поради заканите на претседателот Доналд Трамп. Бесент, зборувајќи на состанокот на кабинетот во Белата куќа, рече дека главната заработка од новите царини на Трамп не започнала сè до вториот квартал, кога Трамп воведе речиси универзална царина од 10% за американскиот увоз и ги зголеми царините за челик, алуминиум и автомобили.

Уште едно бебе во Газа почина од неухранетост и дехидрација

Бебето Селам Абу Вади почина поради недостаток на храна и вода во блокираниот и опустошен од Израел Појас Газа. Телото на бебето е префрлено во Баптистичката болница Ал-Ахли во градот Газа за погребни процедури. Смртта на бебето доаѓа во услови на континуирани израелски напади и блокада на Газа, што доведоа до сериозен недостиг на храна, вода, гориво и лекови.

ФБИ покренал кривична истрага против поранешни директори на ЦИА и ФБИ

Федералното истражно биро на САД (ФБИ) започна кривични истраги против поранешниот директор на Централната разузнавачка агенција (ЦИА), Џон Бренан, и поранешниот директор на ФБИ, Џејмс Коми, објави „Фокс њуз диџитал“, повикувајќи се на неименувани извори. Истрагите се однесуваат на можни злоупотреби поврзани со претходни владини истраги за наводно руско мешање во изборите во САД во 2016 година, во кои американскиот претседател Доналд Трамп ја победи поранешната државна секретарка Хилари Клинтон, се вели во извештајот.

Нелегални доселеници нападнаа палестински град на Западниот Брег, неколкумина беа повредени

Неколку Палестинци беа повредени во нов напад од нелегални израелски доселеници на окупираниот Западен Брег во вторникот, изјави локален жител. „Доселениците поставија шатор и трло за овци на врвот на планината Хамруш во градот Саир“, североисточно од Хеброн во јужниот дел на Западниот Брег, рече Набил Јунес. Според него, областа е во сопственост на неколку палестински семејства, а сопственоста е документирана со отомански акти.

И за крај на денешниот блиц...

Франција: Пожарот во близина на Марсеј сè уште не е изгаснат, 110 лица полесно повредени

Пожарот на југот на Франција што избувна во вторникот во близина на Марсеј, во Пен-Мирабо, сè уште не е изгаснат, а според министерот за внатрешни работи Бруно Ретајо, 110 лица се полесно повредени, вклучувајќи девет пожарникари и 22 полицајци. Според Ретајо, кој пристигна во Марсеј синоќа и се сретна со локалните власти, 800 пожарникари биле распоредени синоќа за да го изгаснат пожарот во текот на целата ноќ.

Тоа е сѐ за денешните блиц вести. За повеќе посетете нѐ на macedonian.trtbalkan.com