ئەرمېنىيە باش مىنىستىرى نىكول پاشىنيان دۆلىتىنىڭ قوشنىسى ئەزەربەيجان بىلەن ھاسىل قىلىنغان تىنچلىق كېلىشىمى لايىھەسىگە ئىمزا قويۇشقا تەييار ئىكەنلىكىنى ئېلان قىلدى.
پاشىنيان چارشەنبە كۈنى ئىجتىمائىي تاراتقۇ سۇپىسى «X» تىكى ئادرېسىدا بايانات ئېلان قىلىپ: «ئەرمېنىيە بىلەن ئەزەربەيجان تىنچلىق كېلىشىمى لايىھەسى ئۈستىدە ئورتاق تونۇش ھاسىل قىلغان بولۇپ، (ھەر ئىككى تەرەپ ئۇنىڭ) ئىمزالىنىشنى كۈتمەكتە. مەن كېلىشىم ھاسىل قىلىنغان لايىھەگە ئىمزا قويۇشقا تەييار» دېدى.
پاشىنيان بۇ باياناتنى ئەزەربەيجان بىلەن ئەرمېنىيەنىڭ ئۆتكەن پەيشەنبە كۈنى تىنچلىق كېلىشىمى لايىھەسى ئۈستىدە كېلىشىم ھاسىل قىلغانلىقىنى جاكارلىشىدىن كېيىن ئېلان قىلدى ؛ بۇ كېلىشىم ئون يىللاردىن بېرى داۋاملىشىپ كەلگەن توقۇنۇشنى ئاخىرلاشتۇرۇشنى ۋە باكۇ بىلەن ئەرىۋان ئوتتۇرىسىدا دىپلوماتىك مۇناسىۋەت قۇرۇشنى مەقسەت قىلماقتا.
ئىككى سابىق سوۋېت جۇمھۇرىيىتى ئوتتۇرىسىدىكى مۇناسىۋەتلەر، 1991-يىلى ئەرمېنىيە قىسىملىرىنىڭ، خەلقئارا جەمئىيەت ئەزەربەيجاننىڭ بىر پارچىسى دەپ ئېتىراپ قىلىۋاتقان قاراباغ ۋە ئۇنىڭغا قاراشلىق يەتتە رايوننى ئىشغال قىلىشى بىلەن كەسكىنلىشىپ كەتكەنىدى.
ئەزەربەيجان 2020-يىلى كۈزدىكى 44 كۈن داۋاملاشقان ئۇرۇش ئارقىلىق زېمىنلىرىنىڭ كۆپ قىسمىنى قايتۇرۇۋالغان. بۇ ئۇرۇش، ئىككى دۆلەت ئارىسىدىكى مۇناسىۋەتلەرنى نورماللاشتۇرۇش ۋە چېگرا بەلگىلەش سۆھبەتلىرىنىڭ ئۆتكۈزۈلۈشىگە يول ئاچقان رۇسىيە ۋاسىتىچىلىكىدىكى تىنچلىق كېلىشىمى بىلەن ئاخىرلاشقانىدى.
2023 -يىلى سېنتەبىردە ئەزەربەيجان رايوندىكى بۆلگۈنچى كۈچلەرنىڭ تەسلىم بولۇشىدىن كېيىن قاراباغدا تولۇق ئىگىلىك ھوقۇقىنى قولغا كەلتۈرگەنىدى.
TRT Global - As the historic peace deal nears, Yerevan still has unmet obligations to prove it respects Baku’s security over its territorial integrity.
