Xitoy generativ sun'iy intellekt (AI) texnologiyasidan foydalanib, Tayvanga qarshi dezinformatsiyani kuchaytirayotgani va bu orqali Tayvan jamoatchiligini "bo‘lish" maqsadini ko‘zlayotgani haqida orolning Milliy Xavfsizlik Byurosi ma'lum qildi.
Tayvan Xitoyni so‘nggi yillarda harbiy mashg‘ulotlar, savdo sanksiyalari va ta'sir kampaniyalarini kuchaytirib, orolni Xitoy suvereniteti da'volarini qabul qilishga majburlashga urinishda aybladi. Tayvan Xitoyning suverenitet da'volarini qat'iyan rad etadi.
Xitoy shu oyda demokratik boshqaruvdagi orol yaqinida ikki kunlik harbiy o‘yinlar va jangovar mashg‘ulotlar o‘tkazdi, bu esa Qo‘shma Shtatlar va uning ko‘plab ittifoqchilari tomonidan xavotir bilan qarshi olindi.
Sun'iy intellekt bilan "kognitiv urush"
Parlamentga taqdim etilgan hisobotda — Reuters tomonidan ko‘rib chiqilgan nusxaga ko‘ra — xavfsizlik byurosi joriy yilning o‘zida ijtimoiy tarmoqlar, jumladan Facebook va TikTok platformalarida yarim milliondan ortiq "munozarali xabarlar" aniqlanganini bildirdi.
Hisobotda aytilishicha, Pekin Prezident Lai Ching-te'ning o‘tgan oyda Xitoy bo‘yicha qilgan nutqi yoki chip ishlab chiqaruvchi TSMC kompaniyasining AQShga yangi investitsiya kiritish haqidagi e'loniga o‘xshash nozik vaziyatlarni nishonga olgan. Bu harakatlar "kognitiv urush" deb atalib, jamiyatimizda bo‘linish yaratishga qaratilgan, deyiladi hisobotda.
"AI texnologiyasi qo‘llanilishi kengayib va takomillashib borar ekan, Xitoy Kommunistik Partiyasi AI vositalaridan foydalanib, munozarali xabarlarni yaratish va tarqatishda yordam olayotgani ham aniqlangan," deyiladi hisobotda.
Xitoyning Tayvan ishlari bo‘yicha idorasi bu borada izoh berish so‘roviga javob bermadi.
‘Kulrang zona’ taktikasi
Hisobotda aytilishicha, Xitoy Tayvanga qarshi "kulrang zona" taktikalarini ham kuchaytirgan, shu yilning o‘zida Xitoy qirg‘oq qo‘riqlash kuchlarining hujumlari, shuningdek, Tayvan suv va havo hududlarida kuzatilgan havo sharlarining soni keskin oshgan.
Bu harakatlar Tayvanni o‘z kuchlarini safarbar qilishga majbur qilgan va uning resurslarini kamaytirgan, deyiladi hisobotda.
Mart oyida Lai, faqat Tayvan xalqi o‘z kelajagini hal qilishi mumkinligini ta'kidlab, Xitoyni "xorijiy dushman kuch" deb atadi.
Xitoy Tayvanni o‘z hududining bir qismi deb hisoblaydi va zarur bo‘lsa, kuch bilan o‘z nazoratiga olishni rejalashtiradi.
