Səhiyyə rəsmiləri bildiriblər ki, 3 yaşlı bir qız A(H5N1) ştammına yoluxduqdan sonra çoxlu orqan və kəskin tənəffüs çatışmazlığı səbəbindən vəfat edib. Milli Diaqnostika və Epidemioloji İnstitutu (InDRE) qərbdəki Duranqo əyalətindən olan uşağın A(H5N1) ştammına yoluxduğunu təsdiqləyib.

Məlumata görə, virusa yoluxan uşaq ağır vəziyyətdə Koahuila ştatındakı özəl xəstəxanaya yerləşdirilib. Koahuila ştatının səhiyyə naziri Eliud Aguirre çərşənbə axşamı keçirdiyi mətbuat konfransında, "Bu gün 3 yaşlı qızın faciəli şəkildə öldüyü barədə məlumat aldıq" deyə bildirib. Uşağın çoxlu orqan və kəskin tənəffüs çatışmazlığı səbəbindən həyatını itirdiyi vurğulanıb.

Aguirre həmçinin bildirib ki, infeksiyanın mənbəyi hələ də müəyyən olunmayıb və səlahiyyətlilər digər infeksiyalara nəzarət etməyə davam edirlər. Lakin bu günə qədər virusa yoluxmuş başqa bir hal qeydə alınmayıb. Qızın yaxınları və ona qulluq edən tibb işçiləri nəzarət altındadır.

Səlahiyyətlilər indiyədək 38 nəfərin virus üçün verdiyi testin hamısının mənfi çıxdığını bildiriblər. Qeyd edək ki, ötən il Meksika ştatında 59 yaşlı bir kişi quş qripindən dünyasını dəyişmişdi.