Kanadanın Toronto şəhəri yaxınlığında yerləşən ictimai kitabxanada bir müsəlman qadına hücum edən şəxs saxlanılıb. Hadisə bazar günü baş verib. Yerli polisin yaydığı məlumata görə, təcavüzkar qadının baş örtüyünü yandırmağa cəhd edib.

Polisin açıqlamasına görə, qadın kitabxanada kitab oxuyarkən tanımadığı bir şəxs ona yaxınlaşıb və onu söyməyə başlayıb. Daha sonra şübhəli şəxs qadının hicabını çıxarmağa cəhd edib və üzərinə naməlum maye tökərək onu yandırmağa çalışıb. Zərərçəkmiş kitabxananın mühafizəçilərindən kömək istəyib. Polis şübhəlinin hadisə yerindən qaçdığını, lakin bir neçə saat sonra saxlanıldığını bildirib.

Kanada Müsəlmanları Milli Şurası (NCCM) hadisə ilə bağlı mətbuata açıqlama verərək, dəhşətə gəldiklərini bildirib. Şuranın baş icraçı direktoru Stiven Braun deyib: "Bu cür zorakılığın cəmiyyətimizdə adi hal alması qəbuledilməzdir. Son illərdə islamofobiya hallarının artması müşahidə edilir. Seçilmiş liderlərimizin bu problemi həll etmələrinin vaxtı çatıb.”

Ayax meri Şaun Kollier və kitabxana idarə heyətinin prezidenti Piyali Korreya şəhərin rəsmi saytında birgə bəyanat yayıblar.

“Biz bu dəhşətli hadisənin qurbanına və bu hücumdan təsirlənən hər kəsi dəstəkləmək üçün buradayıq, xüsusən də bu hadisənin sülh ayı olan Ramazan ayında baş verməsi bizi daha da narahat edir” deyə bəyanatda vurğulanıb.

Braun həmçinin bildirib ki, Kanada Müsəlmanları Milli Şurası polisdən hadisəni nifrət cinayəti kimi araşdırmasını xahiş edib.