İtaliyanın ‘‘Beş Ulduz’’ hərəkatının lideri Cüzeppe Konte cümə axşamı Qəzzaya hücumlara görə İsrailə genişmiqyaslı silah embarqosu tətbiq etməyə çağırıb.

"Cəmi 24 saatda 100-dən çox adam ölüb. İki həftə ərzində 300-dən çox uşaq öldürülüb" deyən Cüzeppe Konte İsrailin səhiyyə müəssisələri və evləri hədəf almağa davam etdiyini xatırladıb.

Konte İtaliya və Avropanın İsrailin baş naziri Benyamin Netanyahu hökumətinin həyata keçirdiyi vəhşiliyə qarşı səsini ucaltmadığını bildirib. O, Avropa Parlamentinin mövqeyini tənqid edərək, sadəcə "narahatlıq" ifadəsinin "mənasız" olduğunu deyib.

2018-2021-ci illər arasında baş nazir vəzifəsini icra etmiş 60 yaşlı siyasətçi deyib: "İsrailə silah embarqosu tətbiq edilməli və hökumət rəsmiləri və onların tərəfdarlarına qarşı ciddi iqtisadi və diplomatik sanksiyalar həyata keçirilməlidir".

İsrailin 2023-cü ilin oktyabr ayından etibarən Qəzzaya hücumları nəticəsində əksəriyyəti qadın və uşaq olmaqla 50.500-dən çox fələstinli həyatını itirib. Keçən ilin noyabrında Beynəlxalq Cinayət Məhkəməsi (ICC) İsrailin baş naziri Netanyahu və keçmiş müdafiə naziri Yoav Qallantın Qəzzada törətdiyi hərbi cinayətlərə görə həbsinə order verib.

İsrail həmçinin Qəzzada apardığı müharibəyə görə Beynəlxalq Ədalət Məhkəməsində (ICJ) soyqırım ittihamı ilə mühakimə olunur.