Avropa Şurası Parlament Assambleyası (PACE) elan edib ki, 2025-ci il Avropa Mükafatı Türkiyənin cənub-şərqində yerləşən Qaziantep şəhərinə təqdim olundu.

Həmin mükafat hər il Avropa dəyərlərinin təbliğində ən böyük fəaliyyət göstərən şəhərə verilir.

PACE çərşənbə axşamı verdiyi açıqlamada bildirib ki, Qaziantep Türkiyənin Cənub-Şərqi Anadolu Bölgəsində yerləşən 1.200.000 əhalisi olan bir şəhərdir. Duysburq (Almaniya), Celje (Sloveniya), Ostrava (Çexiya), Braqa (Portuqaliya) və Lüdviqshafen (Almaniya) daxil olmaqla 25 şəhərə qardaşlaşıb.

Şəhər Avropa Mobillik Həftəsində fəal iştirak edir və Avropa Gününü qeyd edir. O, həmçinin, Avropa Keyfiyyət İdarəetmə Etiketinə (ELoGE) layiq görülüb.

Şəhər “Eurocities, Energy Cities”, “UNESCO Creative Cities Network” və Türk Bələdiyyələr Birliyinin daxil olduğu 28 beynəlxalq şəbəkənin üzvüdür.

“Bu şəhər sənaye sektoru, xüsusilə tekstil və istehsalat sahəsində tanınan əsas iqtisadi mərkəzdir və Türkiyədə iqlim dəyişikliyinə qarşı fəaliyyət planını tətbiq edən ilk şəhərdir,” deyə açıqlamada qeyd olunub.

PACE həmçinin bildirib ki, Qaziantep davamlılıq, şəhər inkişafı, ağıllı şəhər tətbiqləri, ətraf mühitin qorunması və sakinlərinin rifahına xüsusi diqqət yetirir.

AŞPA tərəfindən 1955-ci ildə təsis edilmiş Avropa Mükafatı Avropa şəhərinin Avropa əməkdaşlığının inkişafına verdiyi töhfəyə görə ala biləcəyi ən yüksək mükafatdır. Mükafata kubok, medal, diplom və qalib şəhərin gəncləri üçün Avropa institutlarına təhsil səfərinin təşkili üçün istifadə olunan qrant daxildir.