Rusiya Ukraynanın şimal-şərqindəki Sumı vilayətinin Basivka kəndini ələ keçirdiyini və bölgədəki bir neçə yaşayış məntəqəsində Ukrayna əsgərlərini hədəfə aldığını açıqlayıb.

Rusiya-Ukrayna müharibəsindən iki ildən çox vaxt keçdikdən sonra Kiyev 2023-cü ilin avqustunda sərhədi keçərək minlərlə əsgərini Rusiyanın Kursk bölgəsinə göndərdi. Lakin son aylarda Rusiyanın hücumları Ukrayna qoşunlarının əsas hissəsini Kurskdan çıxardı.

Rusiya prezidenti Vladimir Putin dəfələrlə bəyan edib ki, sərhəddə bufer zona yaradılmalıdır.

Rusiya Müdafiə Nazirliyi Sudja sərhəd-keçid məntəqəsindən bir qədər kənarda yerləşən Basivka kəndinin Rusiya hərbçiləri tərəfindən tutulduğunu və Ukrayna qüvvələrinin Sumı vilayətində 12 fərqli nöqtədə vurulduğunu açıqlayıb.

Həmçinin bildirilib ki, Rusiya qoşunları Rusiyanın daxilində Qornal, Quevo və Oleşnya kimi yaşayış məntəqələrində yerləşdirilmiş Ukrayna qoşunlarını dəf edib.

Nəzarət kimdədir?

Hər gün müharibənin gedişatını izləyən Ukraynayönlü "DeepState" xəritəsinə görə, Ukrayna hazırda Rusiya ərazisinin təxminən 63 kvadrat kilometrinə nəzarət edir. Bu rəqəm Kiyevin keçən il iddia etdiyi 1400 kvadrat kilometrdən xeyli azalıb.

Sərhəddə yerləşən Basivka da daxil olmaqla 81 kvadrat kilometr ərazi “nazarət statusu naməlum” zona kimi təsnif edilir.

Hazırda Rusiya Ukrayna ərazisinin təxminən beşdə birinə nəzarət edir. Bu ərazilərə 2014-cü ildə ilhaq etdiyi bütün Krım, demək olar ki, bütün Luqansk, Donetsk, Zaporojya və Xerson vilayətlərinin 70 faizindən çoxu daxildir. Bundan əlavə, Xarkov vilayətinin kiçik bir hissəsi Rusiyanın nəzarətindədir.