Bazarel Smotriç İsrail Təhlükəsizlik Kabinetinin İordan çayının qərb sahilindəki 13 yaşayış məntəqəsinin qanuniləşdirilməsi planını təsdiqlədiyini bildirib. O, bu addımı "Yaşayış məntəqələrində normallaşma və tənzimləmə inqilabını davam etdirmək" kimi qiymətləndirib. "Gizlənmək və üzr istəmək əvəzinə, biz bayraq qaldırırıq, tikirik və məskunlaşırıq. Bu, Yəhuda və Samariya üzərində suverenliyə doğru atılmış daha bir mühüm addımdır", - deyə Bazarel Smotriç vurğulayıb.
Bu qərar Nazirlər Kabinetinin şənbə günü axşam keçirilən iclasında qəbul edilib. Fələstinin müqavimət hərəkatı "Həmas" İsrailin bu addımını pisləyərək, onu "fait accompli" (bitmiş fakt) adlandırıb. "Bu, xalqımızı köçürməyə, onların torpaqlarını və müqəddəs yerlərini oğurlamağa yönəlmiş irqçi müstəmləkəçilik layihəsidir. Bu addım bütün beynəlxalq və humanitar qanunları açıq şəkildə pozur", - deyə "Həmas"ın bəyanatında bildirilir.
"Həmas" İsrailin işğal altındakı İordan çayının qərb sahilindəki qeyri-qanuni məskunlaşma cəhdlərinin dayandırılması ilə bağlı beynəlxalq ictimaiyyətə çağırış edib.
Fələstin mənbələri 2024-cü ilin sonuna qədər işğal olunmuş ərazilərdə 180 yeni yaşayış məntəqəsinin və 256 mövcud yaşayış məntəqəsinin hər birində təxminən 770 min qeyri-qanuni israillinin yaşayacağını təxmin edir.
Birləşmiş Millətlər Təşkilatı işğal olunmuş Fələstin ərazilərində İsrailin qurduğu bütün yaşayış məntəqələrini beynəlxalq hüquqa zidd hesab edir və genişlənmənin davam etməsinin iki dövlətli həll səylərinə ciddi təhdid yaratdığı barədə xəbərdarlıq edir.
İordan çayının qərb sahilində gərginlik yüksək olaraq qalır. Fələstin Səhiyyə Nazirliyinin məlumatına görə, 2023-cü il oktyabrın 7-də Qəzzaya hücumun başlamasından indiyədək İsrail ordusu və qeyri-qanuni məskunlaşanların hücumları nəticəsində azı 937 fələstinli həlak olub, 7000-dən çox fələstinli isə yaralanıb.
İyul ayında Beynəlxalq Ədalət Məhkəməsi İsrailin Fələstin ərazilərindəki uzun müddətir davam edən işğalını qeyri-qanuni hesab edərək, işğal altındakı İordan çayının qərb sahili və Şərqi Qüdsdəki bütün yaşayış məntəqələrinin boşaldılmasını tələb edib.
